АҞӘА, нанҳәа 22 — Sputnik, Роберт Џьапуа. Џьиԥ-триал азы иаарту автомобилтә еиндаҭларақәа "Гәыма-2015" Аҟәа араион иатәу Гәыма ақыҭан имҩаԥысраны иҟоуп, цәыббра 11-12 рзы ҳәа ҳкорреспондент изеиҭеиҳәеит автоклуб "Аиааира" алахәыла Сергеи Никитченко.
"Арҭ рҩызцәа аиндаҭларақәа ара раԥхьаӡа акәны имҩаԥысуеит. Иара еиҿкаауп амҩадараҟны аспортныҟәара аинтерес змоу автомашьынақәа рхатәтәыҩцәа рзы", — иҳәеит Никитченко.
Иара иажәақәа рыла, аиндаҭлара еиҿызкааз автоклуб "Аиааира" ауп, ацхыраара ҟарҵоит Аҟәа ақалақь Ахадара аҿари аспорти рызҵаарақәа рзы Аилаки Абаҩарҵәыреи аспорти рзы аҳәынҭқарратә еилаки, автомобилтә еилазаара "Джипперы Сочи".
Информациатә дгылаҩаны иқәгылоит аинформациатә маҵзура Sputnik Аԥсны, иара аспорттә хҭысқәа ӡырнагалоит.
"Ҳара зегьы ибзианы иаадыруеит Аԥсны ишырацәаҩу аекстремал ныҟәцара бзиа избо. Ҳтәылаҟны автомобилтә спорт аҿиара аҿарацәа аӡәырҩы аднаԥхьалап ҳәа сгәы иаанагоит. Џьиԥ-триал — ари иҷыдоу спорт хкуп. Аԥсабара аԥшӡареи иареи анеицылалак, алахәылацәеи ахәаԥшцәеи еиуеиԥшым аемоциа бзиақәа цәырнагоит. Ҳара иҳалшо зегь ҟаҳҵоит урҭ зегьы Sputnik адаҟьақәа рҟны ишахәҭоу еиԥш иаарԥшызарц", — иҳәеит Sputnik Абхазиа анапхгаҩы Инал Лазба.
Никитченко иазгәеиҭеит аусмҩаԥгатә ишалахәхо Аԥсныи Урыстәылеи рҟынтәи авто абзиабаҩцәа.
"Автоеиндаҭлара еихшоит ҩ-категориакны: 33 диуим змои уи инеиҳауи абарбалқәа зҵоу автомашьынақәа ҳәа. Ҳара иазҳархиахьеит амаршрут. Аиндаҭлара аинтерес аиуеит. Алахәылацәа зегьы акәылӡхылԥақәа рымазароуп, рмашьынақәа еиқәшәазароуп", — азгәеиҭеит Никитченко.
Џьиԥ-триал аиндаҭларақәа мҩаԥысуеит аԥынгылақәа ахьыҟоу аҭыԥқәа рҟны. Аиндаҭлара иахықәкуп аамҭа маҷла иарбоу амҩа ахысра.
