АҞӘА, жәабран 1 — Sputnik, Рада Ажьиԥҳа. Ахәыҷтәы акәашаратә студиа "Афырҭын" акәашаҩцәа риааирақәа зегьы ҳгәы рыладууп, абри атәы иҳәеит ансамбль асахьаркыратә напхгаҩы Лев Қьецба.
"Ансамбль "Афырҭын" 15 шықәса ирылагӡаны аконкурсқәа жәпакы ирылахәын, изныкымкәа аԥхьахәқәа ҳаманы Аԥсныҟа ҳаахьеит. Ҳиааирақәа еснагь ҳгәы рыладууп", — ҳәа иҳәеит Лев Қьецба.
Асахьаркыратә напхгаҩы иажәақәа рыла, Шәачатәи афестиваль–конкурс "Европа агәыӷырҭа" аҟны ахәаԥшцәа идырбан ҩ-кәашарак.
"Ҳансамбль аҟны ирацәоуп иқәыргыланы иҳамоу акәашарақәа, иааидкыланы ҩажәа кәашара рҟынӡа инаӡоит. 12-13 шықәса зхыҵуа акәашацәа ргәыԥ алоуп аиааира шаҳгаз ари аконкурс аҟны, ахәаԥшцәа идҳарбеит ҩ-кәашарак: аԥсуа кәашареи, аварцәа рыкәашареи", — ҳәа ацыиҵеит иара.
Ари афестиваль аҳәаақәа ҭбаауп, уи иалахәуп Италиа, Румыниа, Израиль, Болгариа, Казахстан, Урыстәыла уҳәа аколлективқәа рацәаны.
"2018 шықәсазы Голливуд имҩаԥысран иҟоу "Европа агәыӷырҭа" афестиваль алахәхаразы, астудиа "Афырҭын" ааԥхьара азыҟаҵан. Авизеи, аҟәрышьи рыла уадаҩра ҳмоур, хымԥада ҳцоит", — иҳәеит астудиа асахьаркыратә напхгаҩы Лев Қьецба.
Гагратәи ахореографиатә студиа "Афырҭын" Шәачатәи афестиваль–конкурс "Европа агәыӷырҭа" Гран-При иаԥсахеит, уи алагьы Голливудҟа ааԥхьара роуит.
