13:06 23 Ажьырныҳәа 2018
Аҟәа+ 15°C
Ишиашоу ицо аефир
Парламент.

Апарламент "аныҳәатә" спектакль

© Sputnik / Томас Тхайцук
Аналитикеи аиҿцәажәарақәеи
Икьаҿу ахьарԥш аиура
Елеонора Коӷониаԥҳа
161 0 0

Аԥсны Жәлар Реизара аилатәараҿы Аԥыза-министр Беслан Барцыц игәрамгара азҵаара аилатәара амшхәаԥштә азҵаараҿы иарбазарц иҟаҵаз ажәалагалазы лгәаанагара лҳәоит Sputnik аколумнист Елеонора Коӷониаԥҳа.

Ашықәс ахыркәшамҭаз Жәлар реизара Аԥсны абиуџьет азы рыбжьы анырҭиуаз аҽны, аӡәгьы игәы иҽанӡамкәа асценари ҿыц аацәырҵит. Ашықәс ҿыц аламҭалаз атеатрқәа рҿы Аҵаа Бабадуи Асҭыԥҳаи злахәу аныҳәатә спектакльқәа ықәдыргылоит ахәыҷқәа рзы. Жәлар реизара акәзар, иааҳаднагалеит аполитикатә "ныҳәатә" спектакль апремьера, ихадароу ароль уи аҿы уажәазы инеигӡеит адепутат Илиа Гәниа.

Акыр аамҭа идырххозаргьы, адепутатцәа абиуџьет рыдыркылеит, аха убри аамҭазы иаацәырҵит Аԥсны аԥыза-министр игәрамгара азҵаатәы асессиаҿы абжьаҭаразы ақәыргылара. Аиашазы, ҳарҭ ауааԥсыра аиҳабыра русуразы агәынамӡара еснагь иҳамоуп, аха анагӡаратә мчы ирыднагалаз абиуџьет адепутатцәа ирыдыркылеит, убри аамҭазы аминистрцәа реилазаара ԥхьатәара рышьҭра азҵаатәгьы аацәырыргеит.

Избан ас ргәы ианҭаз аԥыза-министр Апарламент ахь днаганы агәынамӡарақәа рызҭо азҵаарақәа зирымҭаз, иарбану хықәкыла адепутатцәа иалыркаауа аԥыза-министр иамхра иаалырҟьаны ианықәдыргыло?

Адуниеи аҿы еицырдыруа адраматургцәа рпиесақәа рҿы абас ауаҩы азҵаатәы имоурц азы, апиеса иалоу ахаҿқәеи имҩаԥысуа ахҭысқәеи логикала еишьашәало цәаҳәала еиԥыршьуеит.

Ԥхынҷкәын 28 рзы Апарламент иқәнаргылаз аспектакль акәзар, адилетанттә ҟазшьа амоуп, избанзар, ас еиԥш иҟоу азҵаатәқәа адепутатцәа адгыларц азы, иаҭахыуп аекономикатә, аполитикатә лкаақәа, иџьбароу авбақәа наваргыланы.

Ҳара алхыҩцәа ҳхәыцуеит, иҟалазеи ашықәс ҿыцха иаалырҟьаны? Избан атеатрқәа ирымакны Апарламент ашықәс ҿыцазтәи инегативтәу аспектакль зҳадыргалаз? Иашьҭада аԥыза-министр иҭыԥ? Ирымоузеи уажәтәи аиҳабыра ԥхьатәара изышьҭуа идеиас, иԥсахтәузеи ҳтәыла асоциал-економикатә ҭагылазаашьа аԥсахразы? Абарҭқәа ҳарзымхәыцкәа, аӡә дықәганы, даҽаӡә аҭыԥ иҭара ҵакыдоуп. Аԥсҭазаара иаҳнарбахьеит, башаԥсахра алҵшәа шаанамго.

Апарламент
© Sputnik / Томас Тхайцук

Схатә гәаанагара сҳәозар, Апарламент ари ашықәс ахыркәшамҭаз аҵыхәтәантәи асессиаҿы иԥҩаԥыргаз ахынҭаҩынҭара ауаажәлар ргәалаҟара шьақәнарҟьоит, иара усгьы "зҳаи-зҷышьи еиԥшьны" инхо ауаа рзы арҭ аибарххарақәа рныҳәатә гәалаҟазаара ареицакуеит.

Аԥыза-министр ԥхьатәара ишьҭра азҵаатәы асессиаҿы абжьыҭирахь ицәырган, 20-ҩык адепутатцәа роуп уи аҽалархәра зҭаххаз, дара урҭгьы агәырқьҳәа иадымгылеит 16-ҩык роуп иақәшаҳаҭхаз.

Абасала, Апарламент аспектакль афинал аполитикатә драматургцәа ишырыхәшьадыз ихыркәшамхеит, ас еиԥш иҟоу акрызҵазкуа аполитикатә усқәа реиҿкааразы иаҭахуп апрофессионализм, адилетанттә ҟазшьа змоу асценарии анагӡарагьы цәгьоуп.

Ҳара анаԥшыҩцәа ҳакәзар иаҳҳәоит: ҳаҭыр зқәу адепутатцәа, ҳаԥсҭазаара шәзеиӷьымтәуазар, ныҳәаха ма шәаҳԥырхагамхан.

Автори аредакциеи ргәаанагарақәа еиқәымшәозар ҟалоит.

Ихадоу атемақәа