2014 шықәсазы иҟалаз ахҭыс хадақәа реиқәыԥхьаӡа

© Sputnik 2014 шықәса ахҭысқәа
2014 шықәса ахҭысқәа - Sputnik Аҧсны
Анапаҵаҩра
Sputnik агәаанагарала иҳаҩсуа ашықәсазы иҟалаз ихадароу ахҭысқәа рсиа.

АҞӘА, ԥхҷ 30 – Sputnik, Анастасиа Никонова. Иҳаҩсуа 2014-тәи ашықәс азы имҩаԥысит аполитикатә, акультуратә, аспорттә уҳәа асоциалтә ҵакы змоу ахҭыс дуқәа рацәаны.

Аԥсны абираҟ Аконкагуа ақәцәан! – Sputnik агәаанагарала 10-тәи аҭыԥ ааннакылоит 2014 шықәсазы реиҳа зҵазкуа ахҭысқәа рыбжьара. Ажьырныҳәа жәеиза рзы Ҭенгиз Ҭарба, Дамеи Агрба, Владимир Гәлиа злаз гәыԥҩык аԥсуа альпинистцәа Америка аконтинент аҿы иреиҳау ашьха Аконкагуа аҩаӡарахь ихалеит.

Ажәбатәи аҭыԥ ааннакылоит Нестор Лакоба ихьӡ зху Ашьхарыуаа рышкол 150 шықәса ахыҵра. Ари аҵараиурҭа иузаҟәымҭхо иадҳәалоуп Аԥсны аҳәынҭқарратәии ауаажәларратә усзуаҩцәа рыхьӡқәа, урҭ рхыԥхьаӡараҿы —Дырмит Гәлиа, Несор Лакоба.

Дырмит Гәлиа диижьҭеи 140 шықәса аҵра аабатәи аҭыԥ аҟны игылоуп. Аԥсны Ахада иқәҵарала 2014 шықәса аԥсуа литература ашьаҭаркҩы, жәлар рпоет Дырмит Гәлиа ишықәс акәны иԥхьаӡоуп.

Ахәаԥшцәа акыраамҭа иззыԥшыз аԥсуеи аурыси атеатрқәа реиҭашьақәыргылара ашьҭахь раартра абыжьбатәи аҭыԥ ааннакылоит. Самсон Ҷанба ихьӡ зху Аԥсуа драматә театр аатит аспектакль "Атеатр аартра" ала. Актиорцәа иқәдыргылеит аспектакльқәа "Махаз", "Гәараԥаа рписар", "Ацынҵәарах" уҳәа рҟынтә ацыԥҵәахақәа. Аурыс драматә театр аатит апиеса "Тартиуф" ала.

Аԥснытәи аоператә шәаҳәаҩы Хьыбла Гьырзмаа XXII Аолимпиатә хәмаррақәа раркра ацеремониаҿы лықәгылара зегьы агәахәара ду рнаҭеит. Аԥсны жәлар рартистка "Олимпиатә вальс" захьӡу ашәа налыгӡеит. Станиславскии Немирович-Данченкои рыхьӡ зху Амузыкатә театр ашәаҳәаҩ Хьыбла Герзмаа аҳауа иалаз аӷба дақәгыланы ашәа лҳәон. Ари ахҭыс ианаҳшьоит афбатәи аҭыԥ.

Ален Аҩӡба – адунеи актәи аракетка – ахәбатәи аҭыԥ  имоуп Sputnik ареитинг ала. Ален иигаз аиааира Аԥсны ахы аҵыхәа гәырӷьаҿҳәашаны иалыҩит. Атурнир  "Рождественский кубок" аҟны иаиааира иабзоураны адунеи актәи аракетка ҳәа ахьӡ игеит 14 шықәса зхыҵуа Ален Аҩӡба.

Ашықәс ареитинг аԥшьбатәи апозициаҿы дгылоуп Денис Царгәыш. Ташкент имҩаԥысуаз зхы иақәиҭу аиқәԥараз Адунеи ачемпионат афинал аҟны Аԥснытәи ақәԥаҩ диаиааит иапониатәи аспортсмен Сохсуке Такатани, убри алагьы Денис Царгәыш хынтәны адунеи дачемпионхеит.

Аҧсны Аҳәынҭқарреи Урыстәыла Афедерациеи рыбжьара "Аусеицуреи астратегиатә еиҩызареи" рзы Аиқәшаҳаҭра адкылара 2014-тәи ашықәс ихадоу ахҭысқәа рыбжьара ахԥатәи аҭыԥ аҿы игылоуп. Адокумент Аҳәынҭқаррақәа рхадацәа рнапы аҵарыҩит Владимир Путин шәачатәи ирезиденциа "Бочаров Ручей" аҟны. Аиқәшаҳаҭра иазԥхьагәанаҭоит ашәарҭадареи, асоциалтәи, аекономикатәи ахырхарҭақәа рыла аусеицура.

Аԥсны Ахада изаамҭанытәым иалхрақәа аҩбатәи аҭыԥ аҟны игылоуп. Алхрақәа турк ала имҩаԥысит, абжьқәа зегь реиҳа ргеит Аҳәынҭқарра Ахада Рауль Ҳаџьымбеи Ахада ихаҭыԥуаҩ Витали Габниеи.

2014-тәи ашықәс ихадоу ахҭыс –  лаҵарамза 27 рзы иалагаз аполитикатә кризис. Аԥсны Аҳәынҭқарра уаанӡатәи Ахада имҩаԥигоз аполитика ауаажәлар ирызцәырнагаз агәынамӡара иахҟьаны аҳҭнықалақь аҟны ажәлар еизеит. Ахҭысқәа зегьы ирылҵшәаны Аҳәынҭқарра Ахада изаамҭанытәым иалхрақәа мҩаԥган.

Ажәабжьқәа зегьы
0