ГАГРА, жәб 18 – Sputnik, Саида Жьиԥҳа. Пицунда ауаажәлар ақәшаҳаҭӡам ауахәамаҟны аамҭаказы анцәаимҵаныҳәарақәеи ауарӷанарҳәареи ахьымҩаԥысуа. Абри атәы рҳәеит ашәахьа имҩаԥыргаз аизараҟны.
Аԥсны ахада инапынҵақәа назыгӡоз Валери Бганба 2014 шықәса ԥхынгәымза 30 рзы ақәҵара инапы аҵаиҩит Акультура аминистрреи, Аҭоурыхтә-культуратә ҭынха аиқәырхаразы аусбарҭеи ауарӷан ауахәама идәылганы даҽа ҭыԥк ахь иргарц азы "алшара рыԥшаарц", ауахәама ахықәкы хада ахьынанымгӡо азы.
Уи аахыс Аԥсуа иашахаҵаратә уахәама лассы-лассы анцәаиҳәара мҩаԥнагоит. Аха Пицунда ауаажәлар агәра ганы иҟоуп анцәахаҵареи ауарӷанарҳәареи реилагӡара ауахәамаҟны иауам ҳәа.
"Ҳара иаҳгәалашәоит Пицунда ауарӷан аныҩнадыргылоз. Ауахәама аҭоурых-архитектуратә комплекск аҳасабала аԥсшьаҩцәа маҷымкәа иаднаԥхьалоит. Ауарӷанарҳәаратә концертқәа рымҩаԥгара ианалага инаркны Пицундаҟа аара иалагеит Асовет Еидгыла адагьы адунеи егьырҭ атәылақәа рҟынтәгьы", — рҳәеит ауаажәларра рхаҭарнакцәа ақалақь аҿар еиҿыркааз аизараҟны.
Пицундатәи ауарӷан абжьгарала иалкаау аҭыԥ ааннакылоит Европа иҟоу аинструментқәа рыбжьара. Ауахәама аҟынтәи ҟәардәк иадымхаргьы идәылугар, акустика аҽаԥсахуеит, анцәаиҳәарақәа рымҩаԥгараан ауахәамахь инаргоит еиуеиԥшым амаҭәахәқәа, урҭ ауарӷан абжьы ацқьара иаԥырхагоуп, ҳәа лгәы иаланы илҳәеит Пицунда инхо аԥҳәыс.
"Пицунда – аԥсшьарҭатә ҭыԥуп, хымз рыла иҳауа аԥара алоуп ҳхы зланыҟәаҳго. Ҳара Анцәа дхаҳҵоит, аха ҳгәы иаанагоит анцәаиҳәара ахьымҩаԥысуа аҭыԥ акәӡам аус злоу ҳәа. Ауахәама иахьаҵанакуа иҟоуп анцәаиҳәарақәа ахьымҩаԥугаша даҽа хыбракгьы. Ҳара, Пицунда ақалақьуаа, иаҳмазҵаакәа аӡәгьы азин имаӡам ауарӷан азҵаара аӡбра, уи ҳара иагьаҳауӡом", — рҳәеит Пицунда ауаажәлар.
Пицунда ақалақь ахада Чингиз Бигәаа ауаажәлар дрыдгылоит ауарӷан аиқәырхара азҵаараҿы, убри аамҭазгьы ааԥхьара ҟаиҵоит Аԥсуа иашахаҵаратә уахәама аиҳабыи, акультуреи аҭоурыхтә-культуратә ҭынха аиқәырхара рминистри рыӡбамҭа иахаҵгыларц.
"Ҳара ауарӷан аиқәырхара ҳҭахуп, аха шәааи ҳазԥшып аб Виссариони Ельвира Арсалиеи ирыӡбо. Урҭ ааигәа еиқәшәараны иҟоуп", — иҳәеит Бигәаа.
Аԥсныи Урастәылеи жәлар рартистка Хьыбла Гьырзмаа Пицундатәи ауахәамаҿы есышықәса имҩаԥылгоит жәларыбжьаратәи аклассикатә музыка афестивальқәа. Аԥсны жәлар рартистка, Урастәыла зҽаҽԥсазтәыз артистка Алиса Гыцԥҳа есышықәса дықәгалоит Пицундатәи ауарӷан зал аҿы, имҩаԥылгоит аклассикатә музыка аконцертқәа. Ара аконцертқәа мҩаԥыргон Свиатослав Белза, ашәа лҳәон Елена Образцова, иқәгылахьеит апианистцәа Денис Мацуев, Владимир Спиваков, Москва авиртуозцәеи. Ауарӷан арҳәацәа Марина Шамԥҳа, Лука Гаделиа ауарӷан музыка абзиабаҩцәа рыгәқәа хырхуан. Аҵыхәтәантәи ашықәсқәа жәлар рартистка Марина Шамԥҳа лнапрхгарала имҩаԥысоит афестиваль "Пицунда ауарӷан хәылԥазқәа" захьӡу. Ари афестиваль рхы аладархәуеит еицырдыруа Европатәи ауарӷанарҳәаҩцәа.
Пицундатәи ауарӷан ҳазҭоу ашықәс азы 40 шықәса ахыҵуеит.
