АҞӘА, рашә 12, Sputnik, Наала Аҩӡԥҳа. Аԥсны Аҳәынҭқарра Ахада Рауль Ҳаџььымба, ареспубликаҟны аграртә сектор аҳәынҭқарра-хаҭалатә партниорра ацхыраарала аҿиара аиуроуп ҳәа ажәалагала ҟаҵо дықәгылеит. Ари атәы иара иҳәеит атәыла ахада иусбарҭаҟны ахәашаҽны имҩаԥысуаз аилацәажәараҟны.
Аекономиказ атәыла ахада иабжьагаҩ Амиран Лагәлаа иажәақәа рыла, асеиԥш иҟоу аидеиа иаҵанакуеит афермертә нхамҩақәа реидгыла аԥҵареи анхаҩцәа русурақәа рымҩаԥгаразы ихымԥадатәины иҟоу амаҭәахәқәа зегь рыла еиқәзыршәо аҳәынҭқарратә еилахәыра аԥҵареи.
Лагәлаа иажәақәа рыла имҩаԥгахоит апроект аӡыргара, ақыҭауаа рзы аҳәаанхыҵтәи азанаҭуаа атренингқәа мҩаԥыргалоит.
"Ари апроект иагәыцә хаданы иҟалоит аҳәынҭқарратә напхгараҭаратә еилахәыра. Иара аиҭаҳатәқәеи, ажәлақәеи иара убасгьы иаҭахны иҟоу зегь рыла анхацәа еиқәнаршәоит. Абри аилахәыраҟны иаԥҵахоит аихшаратә центр", — иҳәеит А. Лагәлаа.
Иара игәаанагарала, апроект лассы иалнаршараны иҟоуп Аԥсны аҩныҵҟатәи аџьармыкьа еиуеиԥшым аиаҵәарақәеи ауҭраҭыхқәеи рыла аиқәыршәара.
Атәыла Ахада иабжьагаҩ иажәақәа рыла анапхгараҭаратә еилахәыра аҳәынҭқарреи анхацәеи еиицырхатәны иҟалоит.
"Афермерцәа ирыдгалахоит ари аилахәыра рхатәыртәырц. Дара, ус, усбарҭак аҟны аус руа иҟалом. Аилахәыра ахалахархәаратә хәԥса ианазнеилак, даргьы ахашәала цҵа роуа иалагоит. Ҳара ҳгәаанагарала, 17-мзы рышьҭахь, дарбанызаалак афермер ирҭаз ахархәагақәа зегьы рыхәԥса шәаны ихазы мацара аусура далагартә алшара иоуеит", — инаҵшьны иазгәеиҭеит Амиран Лагәлаа.
Афермертә еидгыла иаиуеит иаку абренд. Уи ахархәарала иалшоит аҳатә фирма дуқәа аус рыцура, ациҵҵеит иара.
Аԥыза-министр ихаҭыԥуаҩ Д. Сериков дазааҭгылеит аҩныҵҟатәи аарыхҩы ихьчара шаҭаху, зыхә еиҳа еиҵоу аимпорттә аалыҵ аҿаԥхьа иара дшымчыдоу.
"Ареспубликахь иаларгало аалыҵ аиҳарак анаплак дуқәа рҟны иҭрыжьуеит, урҭ ирҿагыланы ахатә нхамҩақәа русура лҵшәадоуп.
Ахатәы нхамҩақәа рҟны иаадрыхуа аалыҵ ахә еиҳа иҳаракхоит", — азгәеиҭеит Д.Сериков.
Амиран Лагәлаа Аҭара ақыҭантәи афермерцәа реидгыла аҿырԥштәы ааигеит. 2014-шықәсазы, италиатәи аттестациатә еиҿкаара урҭ рынхамҩа аалыҵ органикатәуп ҳәа асертификат арҭеит. Ҳаргьы убри амҩоуп ҳазқәыло иҳәеитт иара.
Рауль Ҳаџьымба апрофильтә усбарҭақәа рнапы ианиҵеит жәамш рыҩныҵҟа абри апроект анагӡаразы иаку адокумент ала ажәалагалақәа аздырхиарц.
