АҞӘА, жьҭаара 14 — Sputnik, Сырма Ашәԥҳа. Ауаажәларратә еиҿкаара "Жәларбжьаратәи афонд Аԥсныи" изыцҵоу аҵаразы иҳәынҭқарратәым арҵаратә усҳәарҭа "Арҵаратә центр "Академиеи" аԥхьаҟатәи русеицуреи реиҩызареи рзы аиқәышаҳаҭра рнапы аҵарҩит. Иазгәаҭоу аԥҟарақәа инарықәыршәаны, аҵарадырреи, акультуреи ирызкыу еицырзеиԥшу апроектқәеи апрограммақәеи аус рыдырулалоит.
Арҵаратә центр "Академиа" адиректор Ирина Ҷкадуаԥҳа, "Жәларбжьаратәи афонд Аԥсны" ахада Сенер Гогәуа иҭабуп ҳәа иалҳәеит, аханатә ари ацентр аԥҵараҟны ацхыраареи, адгылареи ахьаиҭаз азы.
"Арҵаратә центр "Академиа" мызки бжаки роуп иҵуа иаԥҵоижьҭеи. Араҟа ԥшь-бызшәак рҵоит: аԥсшәа, аурысшәа, англыз бызшәа, аҭырқәа бызшәа. Арҵаҩцәа рԥышәа ҳаракыуп.
"Иахьатәи аамҭазы аҵара рҵоит 80-ҩык аҵаҩцәа. Есыҽны арзаҳалқәа ҳадаҳкылоит. Аҵара рҵарц рылшоит агәаҳәара змоу зегьы. Ашықәс анҵәамҭазы, англыз бызшәеи, аҭырқәа бызшәеи зҵо рыбжьара аицлабра амҩаԥгара ҳгәы иҭоуп. Аиааира згаз абызшәақәа ртәылахь иҳашьҭуеит", — лҳәеит Ирина Ҷкадуаԥҳа.
Ахәҭакахьала, "Жәларбжьаратәи афонд Аԥсны" ахада Сенер Гогәуа иазгәеиҭеит, ас еиԥш арҵаратә центр аартра хра злоу акакәны дшахәаԥшуа.
"Хымԥада, зегь раԥхьа иргыланы ухатәы бызшәа удыруазароуп. Ҳазҭагылоу аамҭазы атәым бызшәақәа рдырра акырӡа ихәарҭоуп. Ҳара ари ацентр апроект аԥшьгара алзыршаз ҳауп. Иахьазы, уи аусура гәахәала иҳадаҳкылоит, аԥхьаҟагьы излаҳалшо ала адгылара аҳҭоит", — ҳәа азгәеиҭеит афонд ахада Сенер Гогәуа.
Зҵарадырра аизҳара иашьҭоу ирылшоит ари ацентр аҟны, аҳәаанырцәтәи абызшәақәа рдырра арҭбаара. Абри хықәкыс иаман иҳәынҭқарратәым аҵараиурҭа заԥшьгарала иаатыз "Жәларбжьаратәи афонд Аԥсны".
