АҞӘА, абҵара 5, Sputnik, Роберт Џьопуа. Аҩны змам алақәа рхыԥхьаӡара ақалақь амҩақәа рыҟны имаҷхаӡом, есымзы ишыркуагьы, ҳәа Аҟәа ақалақь акоммуналтә напхгара аиҳабы Елена Атиопина Sputnik акорреспондент иалҳәеит.
"Ааигәа 34 ла ҳшьыр акәхеит. Уи ииасыз амз азоуп. Аха рхыԥхьаӡара меиҵхаӡеит. Аҟәара сықәланы сышнеиуаз ишырацәахаз збеит. Асасааирҭа "Тбилиси" аҟны ихоит. Аџьармыкьа – алақәа рацәаны иахьеизо ҭыԥуп. Уаҟа акәац уҳәа иахьырҭиуа адәқьанқәа ирыҩналоит, ахәаахәҭыҩцәа крырҿарҵоит. Иашьцылахьеит, аӡәгьы иԥхаиҵаӡом", – лҳәеит Атиопина.
Лара излалҳәо ала, уи апроблема аԥыхразы иазоурыжьуа аԥарақәа азхаӡом.
"Аҩны змам алақәа рыкразы абиуџьет иазоунажьит 600 нызқь мааҭ аԥара. Аха аиашаз уи азхаӡом, уи ахарала ҳгәы иҭоуп 2016 шықәсазы аизырҳара. Уи апроблема ахьынтәаауа ҳажәлар рҟынтәи ауп. Ҳауаажәлар ақыҭақәа рҟынтәи аласбақәа ақалақьқәа рахь иааргоит, араҟа рхы рбоит ҳәа, ус аҩны змам алақәа рхыԥхьаӡара еизҳауеит", –ҳәа инаҵшьны иазгәалҭеит ақалақь акоммунальтә напхгара аиҳабы.
Атиопина ҿырԥшыс иаалгеит алақәа априутқәа ахьрыздыргыло атәылақәа.
Лара лажәақәа рыла, ақалақь иалоу алақәа рыбжеиҳарак еиуеиԥшым угәыбзиара иазеицәоу ачымазарақәа рымоуп.
Аҩны змам алақәа рыкреи, рышьреи Аҟатәи МУП "Спецавтохозяйство" анапы иануп. Есымзы аусзуҩцәа 30 инареиҳаны алақәа ршьуеит.
