АҞӘА, рашәарамза 9 — Sputnik. Аԥсны Аԥыза-министр Артур Амқәаб иазгәеиҭеит Аԥсны ашьапылампыл азы Афедерациеи ФИФА алаларазы иамоу агәазыҳәара, атәыла иқәынхо ажәлар уи радгылара ФИФА анагӡаратә еилакы ибзиоуп ҳәа ахнаҳәаап ҳәа агәыӷра шимоу. Иара Ашьапылампыл азы Жәларбжьаратәи афедерациа ахада Джанни Инфантино абри азы ашәҟәы изишьҭит.
Иахьатәи аамҭазы Аԥсны азхарҵахьеит Урыстәыла, Никарагуа, Венесуела, Науру, Вануату.
"Аԥсны аҵакырадгьыл аҟны қәҿиарала имҩаԥысыз ачемпионат аихшьаалақәа инарымаданы аҳәара ҟаҳҵоит Аԥсны ашьапылампыл азы Афедерациа ФИФА аилазаарахь адкылара азҵаара шәахәаԥшырц", ҳәа аҳәоит ашәҟәаҟны.
Амҽышаҽны Аԥсны ихыркәшахеит FIFA аилазаара иалам атәылақәеи автономиақәеи злахәыз ConIFA аверсиала адунеи Ачемпионат. Атурнир аихшьаалақәа рыла Аԥсны иааннакылеит актәи аҭыԥ, Пенџьаб – аҩбатәи,
Аҩадатәи Кипр – ахԥатәи, Паданиа – аԥшьбатәи.
"Атәылаҟны ашьапылампыл аларҵәареи аҿиара даара хра аманы иазнеиуеит. Аҳәынҭқарратә программақәа рҳәаақәа ирҭагӡаны ақалақьқәеи ақыҭақәеи рҟны идыргылоит ҳаамҭа иақәшәо астадионқәа, ашьапылампыл асырҭа ҭыԥқәа – апрофессионалцәа реиԥш абзиабаҩцәагьы ахьыхәмаруа. Аԥсны иалҵыз аспортсменцәа ракәзар СССР еизгоу акомандақәа ирылахәны адунеи ачемпионатқәеи Европа ачемпионатқәеи рфиналқәа рҟны ихәмархьан", ҳәа аҳәоит ашәҟәаҟны.
