АҞӘА, нанҳәа 15 – Sputnik, Бадраҟ Аҩӡба. Адыгаа рымҩа, Титов имҩа, Беигәа имҩа, Арцахи Нагорнаиеи амҩақәа рҟны инхо ауааԥсыра атәыла аиҳабыра рхыбра аԥхьа еизеит. Урҭ дҵаны иқәдыргылоит нанҳәа 3-4 рзы иҟаз аӡхыҵреи амшцәгьеи рыхҟьа-ԥҟьақәа аԥыхтәуп ҳәа.
"Сара Адыгаа рымҩаҟны сынхоит. Қәак ааур аӡиас маҷ Аӡаԥшь аҭра иҭыҵны ааигәа-сигәа инхо ирыҵалоит. Ҳара иаҳҭахуп аӡышьҭра дрыцқьарц. Иацтәи ақәоура ашьҭахьгьы аҩнқәа быжьба аӡы рыҵалеит, уаанӡатәи ррыцҳарақәа рзымхошәа. Ари нҵәарак ақәӡамкәа иҟоуп", ҳәа азгәеиҭоит Алықьса Габлиа.
"Ҵыԥх акомпенсациа ҳшәаӡом уи ацынхәрас аӡышьҭра ҳрыцқьоит рҳәеит, аха иахьа уажәраанӡа ҟаҵа ыҟаӡам", — лҳәоит Адыгаа рымҩаҿ инхо Елеонора Сангәлиаԥҳа.
Еизаз рахь дцәырҵуеит Аԥыза-министр Беслан Барцыц. Иара ақалақь Ахадара аҭел дырзасны дҵаны ириҭеит ишалшо ала иаарласны азҵаара рыӡбарц.
Ақалақьуаа Аԥыза-министр иарҳәеит Адыгаа рымҩаҟны иарбанызаалак маҵзурак ак шыҟарымҵаз атәы.
Иара ақалақь Ахадара адҵа риҭеит еизаз рҟынтәи хҩык злахәу аделегациа рыдыркыларц.
