Цәгәырла аԥсыӡкразы аҩбатәи ареспубликатә чемпионат хырқәшоуп

© Sputnik / Саида ЖьиԥҳаЦәгәырла аԥсыӡкразы аҩбатәи ареспубликатә чемпионат хырқәшоуп
Цәгәырла аԥсыӡкразы аҩбатәи ареспубликатә чемпионат хырқәшоуп - Sputnik Аҧсны
Анапаҵаҩра
Аҟәараҟнытә, цәгәырла аԥсыӡкразы Бзыԥҭа имҩаԥысуаз аҩбатәи ареспубликатә чемпионат хырқәшоуп.

ГАГРА, нанҳәамза 30 — Sputnik, Саида Жьиԥҳа. Аԥсны аԥсыӡкреи ашәарыцареи рзы Афедерациа, Бзыԥ аӡиас аҟны имҩаԥнагеит, аҟәараҟынтә цәгәырла аԥсыӡкразы аҩбатәи ареспубликатә чемпиоант. Уи рхы аладырхәит Аԥсныи, Урыстәылеи, Лугански рҟынтә акомандақәа 12.

Цәгәырла аԥсыӡкразы аҩбатәи ареспубликатә чемпионат - Sputnik Аҧсны
Цәгәырла аԥсыӡкразы аҩбатәи ареспубликатә чемпионат мҩаԥысуеит Бзыԥ аӡиас аҟны

Аспортсменцәа реиҳараҩык Урыстәылеи Европеи адунеи изныкымкәа ирчемпионхахьоу роуп. Аԥсны ахьӡала ачемпионат иалахәын акомандақәа быжьба, дара зегьы хҩык-хҩык аԥсыӡкыҩцәа рыла ишьақәгылан.

Акомандақәа реицлабра ахәшьара арҭон 21-ҩык Урыстәылазегьтәии Жәларбжьаратәии аҩаӡара змоу аӡбаҩцәа.

Ачемпионат амҩаԥгаразы, заанаҵы Бзыԥ аӡиас аҳәырԥссара иатәым аҵакыраҟны иоужьын 2000 цыра акалмаҳа. Аԥсыӡкра мҩаԥысуан "икны иоужь" асистемала.

Аԥсыӡкыҩцәа, иркуаз аԥсыӡ напыла иакьымскәа аӡбаҩ инаирбаны ааха амҭакәа иаразнак иоурыжьуан.

Азеиԥш зшьаҟны, цәгәырла аԥсыӡкразы аҩбатәи ареспубликатә чемпионат аҟны актәи аҭыԥ ааннакылеит Санкт-Петербургтәи акоманда, уи алахәцәа иркит 81 ԥсыӡ. Аҩбатәи аҭыԥ ааннакылеит Аҟәатәи акоманда, уи алахәцәа иркит 69 ԥсыӡ. Ахԥатәи аҭыԥ ааннакылеит Лугансктәи акоманда, уи алахәцәа иркит 61 ԥсыӡ.

Хаҭалатәи азшьаҟны, актәи аҭыԥ ааникылеит Пицундатәи аԥсыӡкыҩ Дмитри Ракитиански, иара икит 37 ԥсыӡ. Иазгәаҭатәуп, Дмитри уажәшьҭа ҩынтәны Аԥсны дшачемпионхахьоу.

Аҩбатәи аҭыԥ ааникылеит Санкт-Петербургтәи аԥсыӡкыҩ Артиом Мишин, уи икит 30 ԥсыӡ. Ахԥатәи аҭыԥ даԥсахеит Лугансктәи асас Сергеи Попов, уи икит 28 ԥсыӡ.

Ачемпионат аҟны аԥхьахәқәа згаз иранашьан ахраҿақәеи амедалқәеи агәаларшәагатә ҳамҭақәеи.

© Sputnik / Саида ЖьиԥҳаЦәгәырла аԥсыӡкразы аҩбатәи ареспубликатә чемпионат хырқәшоуп
Цәгәырла аԥсыӡкразы аҩбатәи ареспубликатә чемпионат хырқәшоуп - Sputnik Аҧсны
Цәгәырла аԥсыӡкразы аҩбатәи ареспубликатә чемпионат хырқәшоуп

"Сынтәатәи ачемпионат угәы иаахәаратәы имҩаԥысит. Амш бзиақәа ирыбзоураны, зегьы ианаамҭаз ишахәҭаз еиԥш еиҿкаан. Аӡиас аҟны иоужьыз аԥсыӡ акәзар, даара активла ахы мҩаԥнагон, уи иабзоураны акрагьы мариан. Аҭыԥантәи аԥсыӡкыҩцәеи асасцәеи ныҳәак ирзаҩызахеит ари ачемпионат", — иҳәеит Аԥсны аԥсыӡкреи ашәарыцареи рзы Афедерациа ахада Альберт Бондаренко.

Иара убас, ари ачемпионат аҳәаақәа ирҭагӡаны, аспорттә еицлабра мҩаԥган ақәыԥшцәа рыбжьарагьы.

"Ақәыԥшцәа рыбжьара имҩаԥаагаз ачемпионат иалахәын 6 шықәса зхыҵуа инаддыркны 15 шықәсанӡа. Иааизакны 10-ҩык ахьыбҿар. Урҭ рахьтә аӡәы заҵәык Урыстәылантәи дааны дыҟан, егьырҭ аҭыԥантәи аԥсыӡкыҩцәа хәыҷқәа ракәын. Дара рықәра шмаҷызгьы, адуцәа ирзыԥҵәаз аԥҟарақәа ракәын изықәныҟәоз", — ҳәа инаҵшьны иазгәеиҭеит Альберт Бондаренко.

Ақәыԥшцәа рыбжьара имҩаԥгаз ачемпионат аҟны, актәи аҭыԥ даԥсахеит 15 шықәса зхыҵуа Гагратәи аԥсыӡкыҩ Никита Ахмаметиев, иара икит ф-ԥсыӡк. Аҩбатәи аҭыԥ ааникылеит бжьышықәса зхыҵуа Гәдоуҭатәи аспортсмен Еднар Камлиа, иара икит хә-ԥсыӡк. Ахԥатәи аҭыԥ ианашьан, 12 шықәса зхыҵуа Пицундатәи аԥсыӡкыҩ Саид Габлиа, иара икит хә-ԥсыӡк.

Аԥхьахәқәа аанызкылаз ахәыҷқәа иранашьан ахраҿақәа, амедалқәа, агәаларшәагатә ҳамҭақәа. Ақәыԥшцәа рыбжьара ачемпионат алахәцәа зегьы ҳамҭас ираҭәашьан аԥсыӡкыга маҭәахәқәеи амаругақәеи.

Ааҩык алахәцәа рнапаҿы ирыҭан аквалификациатә шәҟәқәа, ирыхҵан аспортсмен ахԥатәи иразриад.

Аԥсны аԥсыӡкреи ашәарыцареи рзы Афедерациа ахада Альберт Бондаренко, иҭабуп ҳәа реиҳәоит Гагра араион Ахадареи Бзыԥҭа аҳабла анапхгареи, Аҩнуҵҟатәи аусқәа Бзыԥҭатәи аҟәша аусзуҩцәеи, ачемпионат цонаҵы рганахь иаадырԥшыз ацхыраареи авагылареи рзы.

Ажәабжьқәа зегьы
0