АҞӘА, жьҭаара 20 – Sputnik, Роберт Џьопуа. Қьырсаныҳәатә лакә "Рождество в доме Купьелло" иҩит италиатәи акомедиограф Едуардо де Филиппо. Уи иалхыз аспектакль ықәдыргылеит Аурыс драматә театр артистцәа. Аспектакль апремиера мҩаԥысит жьҭаара 19 рзы. РУСДРАМа адиректор хада Иракли Хынҭәба иажәақәа рыла бзиа иубои иузааигәоуи уареи шәеизыҟазаашьақәа еснагь ишыгәцараклатәу атәы зҳәо ҭоурыхуп асценахь ицәыргахо.
"Ауаатәыҩса реизыҟазаашьа еиҳау аҽак ыҟаӡам адунеи аҟны. Аспектакль иаанарԥшуеит ацәгьеи абзиеи аԥсҭазаараҟны мҩакы ишеицану. Едуардо Де Филиппо ипиеса аҟазшьақәа ныҭкааны иҭнаҵаауеит, асиужет аинтерес ду аҵоуп. Зегь раасҭа ихадоу — ари апиеса ишықәсқәеи изанааҭи ирыхьмырԥшыкәа ауаҩы еснагь дыззыԥшу аныҳәеи аџьашьахәреи ахьаанарԥшуоуп. Аспектакль анҵәамҭаҿы уи аныҳәеи аџьашьахәреи хымԥада иҟалоит", — иҳәеит аспектакль алагамҭазы Иракли Хынҭәба.
Арежиссиор Андреи Тимошенко иакәзар иҳәеит акыр игәы шыхыҭ-хыҭуа.
"Ҳара арежиссиорцәа еснагь ҳгәы ҭынчым аспектакль анцәырааго. Ус акәым ҳәа аӡәы иҳәозаргьы – мцуп. Иарбанызаалак аспектакль ҳара ҳзы иԥышәароуп", — иҳәоит Тимошенко.
Аспектакль "Рождество в доме Купьелло" апремиера аншлагла имҩаԥысит. Ахәаԥшыҩцәа рыгәҭа иҟан атәыла Ахада рауль Ҳаџьымба, Аԥсны иҟоу Урыстәыла Ацҳаражәҳәаҩ Семион Григорьев.
Аспектакль ашьҭахь ахәаԥшыҩцәа ргәаанагарақәа рҳәон.
"Аспектакль даара ибзиан, апремиерагьы даара угәы иахәо иҟан. Атеатр – ныҳәоуп. Уи еснагь ҳаԥсҭазаараҿ аҭыԥ амазароуп", — иҳәеит Роман Дбар. Ргәаанагара рҳәеит аҿаргьы: "Зегь сгәаԥхеит. Акызаҵәык угәы узырхьуа – асеиԥш иҟоу аныҳәақәа ҳацәмаҷуп", — иҳәеит Осман Ҭарба.
"Рождество в доме Купьелло" ахәаԥшцәа ирбар алшоит жьҭаара 20-21 рзы. Уи ашьҭахь ахәаԥшцәа ирыдгалахоит 16 шықәса асценаҟны иҟоу, еиҭарҿыцу аспектакль "Тартюф".
Абҵара 10 рзы иҟалоит ахәыҷқәа ирызку аспектакль "Черная курица, или подземные жители" апремиера.
