АҞӘА, абҵара 2 – Sputnik, Владимир Бегунов. Аҩаша, абҵара акы азы Ашәахтәқәеи аизгақәеи рминистр инапынҵақәа назыгӡоз Рауф Цымцба ԥхьатәара дышьҭын.
Рауль Ҳаџьымба иҳәеит Цымцба министрс иҟазаараан инапынҵақәа лҵшәала инеигӡон ҳәа.
"Ҳара иаҳҭахуп ԥхьаҟагьы аус еицаауларц. Аҽа маҵзурак шәнапы ианаҳҵоит. Агәра згоит шәахьнеилакгьы шәусура хра аманы ишыҟало", — иҳәеит Ҳаџьымба.
Рауф Цымцба иазгәеиҭеит иԥсҭазаара абжа ашәахтә структураҟны аус шиуаз, аха атәыла Ахада иӡбра шидикыло, аиҳабыра рҟны аԥсахрақәа аҭахны ишыҟоу бзианы ишеиликаауа.
