АҞӘА, абҵара 15 – Sputnik, Бадри Есиава. Аԥсны Аекономика аминистрреи Урыстәылатәи Афедерациа Аекономикатә ҿиара аминистрреи еицымҩаԥырго аекономикатә форум аатит Аҟәа, абҵара 15 рзы.
Афорум аартраан ажәахә ҟаиҵеит Аԥсны Ахада Рауль Ҳаџьымба. Иара иазгәеиҭеит афорум еиҳа-еиҳа ишеизҳауа, ишыҿио.
"VII Аԥсны-Урыстәылатә усутә форум алахәылацәа зегьы ишәыдысныҳәалоит. Афорум шеишықәса аҿиара аманы, еизҳауа, хра аланы имҩаԥысуеит. Асеиԥш иҟоу аиԥыларақәа шҵоуроу аныԥшуеит атәыла аекономикагьы", — иҳәеит Рауль Ҳаџьымба.
Атәыла Ахада иазгәеиҭеит, Аԥсны аекономика адунеитә кризис аангьы аҿиара аиур шалшо. Уи азы ишаҳаҭгоуп 2015 шықәса иаҿырԥшны ахатә малқәа 30% рыла реизҳара. 2014 шықәса иаҿурԥшуазар — 50% еиҳахеит.
Ҳаџьымба дазааҭгылеит аинвестициатә программақәа русхк аҟны аусеицура алҵшәа бзиақәа шаанашьҭуа, 2016 шықәса рзы ишазыԥхьагәаҭоу 180 обиект рыргылара ахыркәшара.
"Аусутә форум аҳәаақәа ирҭагӡаны имҩаԥысраны иҟоуп астол гьыжьқәа ҩба: атуризми ақыҭанхамҩеи ртемақәа ирызкны", — иҳәеит Аԥсны Ахада.
Афорум амҩаԥысраан ирылацәажәараны иҟоуп атуризм, ақыҭанхамҩа, аинвестициақәа атәылахь рааԥхьара уҳәа азҵаарақәа жәпакы.
