АҞӘА, ажьырныҳәа 23 — Sputnik, Бадри Есиава. Аԥснытәи амандаринақәа Ҭырқәтәылатәиқәа раасҭа еиӷьуп рхаҭабзиарала, ргьамала иҳәеит Аԥсны Ақыҭанхамҩа аминистр Даур Ҭарба Sputnik Аԥсны акорреспондент аинтервиу иҭо.
Урыс бызшәала атекст шәаԥхьар шәылшоит ара >>
Ҭарба игәаанагарала абас шакәугьы аԥсуа мандаринақәа аҳәаанырцәтәиқәа израцлабуам. Ҭырқәтәыла иадҟаҵалаз асанкциақәа раԥыхрагьы сынтәатәи асезон маншәаланы иахьымҩаԥымсыз алагала азнауит.
"Урыстәылатәи аџьармыкьа аҭырқәа ааглыхыҩцәа раалыҵ азы иахьаартхазгьы ҳара ҳсезон иаԥырхагахеит. Аиҳаракгьы урҭ рыхәԥса алаҟәрала. Ҳара ҳаалыҵ акыр ишеиӷьугьы уиаҟара ахәԥса ҳзыларҟәуам", — иҳәеит аминистр.
Даур Ҭарба иара убасгьы иазгәеиҭеит 2016 шықәсазтәи аҳауатә ҭагылазаашьагьы иара ахатәы нырра шыҟанаҵаз, ацитрус шәырқәа зехьынџьара рҭагалара шалмыршахаз.
2017 шықәса ажьырныҳәа 14 азтәи адыррақәа рыла аурыс-аԥсуа ҳәаа иахыгоуп 15 800 тонна ацитрус шәырқәа. Ҵыԥхтәи ашықәс иадкыланы иугозар, 7 880 тонна рыла еиҵоуп.
"Ацитрустә сезон хыркәшоуп ҳәа ҳазҳәом. Арҭ ахыԥхьаӡарақәа ирыцлап ҳәа ҳгәыӷуеит 80-90 тонна рҟынӡа. Иҳагәҭакын 30 000 тонна рҟынӡа ацитрусқәа рыҭира, аха уажәшьҭа уи залыршахом", — иҳәеит Ҭарба.
Аминистр игәаанагарала есышықәса ацитрусқәа рыхәԥса ҭышәныртәалалатәуп.
