АҞӘА, жәабран 16 – Sputnik, Бадраҟ Аҩӡба. Ашәахьа, жәабран 20-нӡа Аԥснытәи аҵаратә усҳәарҭақәа рҟны аҵаратә процесс аанкылахоит ҳәа ҳкорреспондент иалҳәеит Аԥсны Аҵара аминистр ихаҭыԥуаҩ Медеиа Ченгьелиаԥҳа.
"Жәабран 15 шьыжьы инаркны аҵаратә процесс мҩаԥысуан, аха афымцалашара андырцәа ахәыҷқәа рыҩныҟақәа рахь иоужьын. Иӡбан ашколқәеи ахәыҷбаҳчақәеи аркызарц", — лҳәеит аминистр ихаҭыԥуаҩ.
Аԥхьа жәабран 17 рзы аҵаратә процесс ахацыркра азыԥхьагәаҭазҭгьы изҟәамҵыз асоура иахҟьаны жәабран 20 рҟынӡа ашколқәеи ахәыҷбаҳчақәеи аркуп.
Атәыла Ахада Рауль Ҳаџьымба идҵала иаԥҵоуп Аԥыза-министр Беслан Барцыц зхадараҿы дыҟоу аоперативтә штаб, иҟалар зылшо аҭагылазаашьа ҷыдақәа ишалшо ала аҭыԥ рықәҵаразы.
