18:58 28 Мшаԥы 2017
Аҟәа+ 20°C
Ишиашоу ицо аефир
Тамила Аршба

Арышԥҳа: аиҭагаҩцәа-асинхронистцәа разыҟаҵара хәарҭа змоу усуп

© Sputnik / Томас Тхайцук
Аԥсны
Икьаҿу ахьарԥш аиура
5111

Аҳәынҭқарратә бызшәатә политиказы Аҳәынҭқарратә еилакы ахантәаҩы иҳаҭыԥуаҩ Ҭамила Арышԥҳа арадио Sputnik Аԥсны иалҭаз аинтервиу аҟны дазааҭгылеит Будапешт имҩаԥгаз арҵаратә-аиҭагаратә семинарқәа шымҩаԥысыз.

АҞӘА, хәажәкыра 9 – Sputnik, Рада Ажьиԥҳа. Аиҭагаҩцәа-асинхронистцәа разыҟаҵара хәарҭа змоу усуп, избан акәзар макьана профессионалла иазыҟаҵоу аиҭагаҩцәа ҳамаӡам, абри атәы лҳәеит Аҳәынҭқарратә бызшәатә политиказы Аҳәынҭқарратә еилакы ахантәаҩы иҳаҭыԥуаҩ Ҭамила Арышԥҳа.

"Аԥснытәи аҳәынҭқарратә университет астудентцәа хә-ҩык Будапешт имҩаԥысуаз арҵаратә-аиҭагаратә семинарқәа ирылахәын. Ари апроект хықәкыс иамоуп аиҭагаҩцәа разыҟаҵара. Аха ус баша аиҭагаҩцәа ракәымкәа, аиҭагаҩцәа–асинхронистцәа. Уи аҟынтә ари апроект иаҳҭахыз хәарҭара злоу проектуп", — ҳәа лҳәеит Ҭамила Арышԥҳа.

Аҳәынҭқарратә бызшәатә политиказы Аҳәынҭқарратә еилакы ахантәаҩы иҳаҭыԥуаҩ лажәақәа рыла, ас еиԥш асеминарқәа астудентцәа ахысхьан ҩынтә.

"Астудентцәа ҩынтә иахысхьан арҭ асеминарқәа сара срыцны сцаанӡа. Сара хаҭала иҟасҵоз уи акәын, еиҭаргоз сазыӡырҩуан, ирымаз агхақәа гәасҭон. Анаҩс ҳаидтәаланы агхақәа еилҳаргон. Ашьҭахь, аус аныруаз, ианеиҭаргоз игәцаракны сырхылаԥшуан, ирасҳәоз ахшыҩзышьтра аҭаны еиҭаргон. Асинхронтә еиҭагаразы аԥышәа зларымамыз ала, знык-ҩынтә гхак роузаргьы уи уадаҩӡам", — ҳәа лҳәеит аспециалист.

Гәахәарыла исыдыскылеит сара аԥсуа бызшәа аспециалист иаҳасабала астудентцәа асинхронистцәа иахьазыҟарҵо, лҳәеит лара.

"Хымԥада, сеигәырӷьеит сара ари аус еиԥш иахьымҩаԥысуа. Астудентцәа иргәаԥханы ирылшо ала аусура иаҿуп, иацәымаашьаӡакәа. Дара зегьы иргәаԥхоит ари аиҭагара аус. Иџьоушьаша раԥсшәа бзиоуп рызегьы", — ҳәа азгәалҭеит Арышԥҳа.

Аҳәынҭқарратә бызшәатә политиказы Аҳәынҭқарратә еилакы ахантәаҩы иҳаҭыԥуаҩ Ҭамила Арышԥҳа Sputnik Аԥсны иалҭаз арадиоинтервиу шәазыӡырҩыр ҟалоит абра

Ҭамила Арышԥҳа инаҵшьны илҳәеит, астудентцәа аус здырулоз атемақәа шыуадаҩыз. 

"Аус здырулоз атемақәа уадаҩын. Раԥхьатәи амш азы еиҳарак Аԥсны ауаажәларратә, аполитикатә, аекономика атемақәа ракәын изызкыз. Аҵыхәтәантәи амш азы ауаҩы изинқәа ирызкын. Ишыжәдыруа еиԥш ари атема аиҭагара уадаҩуп. Иара атерминқәа иахьа аԥсуа бызшәаҿы рацәак ахархәара рымаӡам. Раԥхьа маҷк иацәшәон даргьы, аха ицәгьамкәа аус руит", — ҳәа ацылҵеит уи.

Аиҭагаҩцәа-асинхронистцәа разыҟаҵаразы апроект еиҿнакаауеит "Европа аилак". Ари апроект Аԥсны наԥхгаҩыс дамоуп Агуманитартә зҵаарақәа рзы Жәларбжьаратәи аимадарақәа ирызку амчнаӡа змоу Аԥсны аҳәынҭқаррра ахада ихаҭарнак Зураб Лакербаиа.

Ихадоу атемақәа