06:26 30 Лаҵара 2017
Аҟәа+ 17°C
Ишиашоу ицо аефир
Ахш иалху ашәаӡа

Ахшлых иалху "ампыл" Нанули лҟынтә

© Sputnik / Илона Хварцкия
Аԥсны
Икьаҿу ахьарԥш аиура
Иҟаҵоуп Аԥсны (22)
55350

Ахш иалху ашәаӡеи ашәхеи рыҟаҵашьа Гәдоуҭа араион Дәрыԥшь ақыҭан инхо Нанули Кәыҵниа-Кәакәасқьыр лҿы еилылкаауан Sputnik акорреспондент Рада Ажьиԥҳа.

Sputnik, Рада Ажьиԥҳа 

Ашыжь асааҭ ааба рзы Sputnik акрреспондентцәа Дәрыԥшь ақыҭан Нанули Кәыҵниа-Кәакәасқьыр дахьынхо агәараҭа агәашә инадгылеит. Акәтқәеи аҳәарақәеи рыбжьы гоит, ақыҭа аԥсҭазаара аилашра иаҿуп. Аԥшәмаԥҳәыс илҳәоит, сара сыжәқәа асааҭ быжьба рзы исхьоит, ахшлых шьыжьнаҵы исыдыскылоит ҳәа.

Ҩынҩажәа шықәса иреиҳауп Нанули Кәыҵниа-Кәакәасқьыр Дәрыԥшь ақыҭан дынхоижьҭеи. Нанули шьҭрала Очамчыра араион Аҭара ақыҭа датәуп. Гәдоуҭаҟа нхара саауеит ҳәа сгәы иҭамызт, лҳәоит лара. Аԥсуа нхара ишаԥу еиԥш аԥмаԥҳәыс лҭаацәеи лареи ирымоуп акәты, акәҷышь, ажәқәа, аҳәарақәа рацәаны. 

Иахьазы, Нанули хә-жәык лхьоит, ҩажәа литра инеиҳаны ахш лоуеит. Лара ишылҳәо ала, ажәқәа рбара аџьабаа шацугьы, ахшлых уара утәы аныҟоу еиӷьу акгьы ыҟам. 

"Сара Аҭара ақыҭан сиит сааӡеит, раԥхьаӡа ажәхьара салагеит ҩ-класск рыҟны сантәаз. Аиашазы, аџьмақәа рыла ауп ахьара шысҵаз. Саб аныга хәыҷы сзыҟаиҵеит, арахә рацәаны иҳаман усҟан. Амала акамбашькәа рхьара сцәыуадаҩын, урт ркыка еиҳа иӷәӷәоу", — ҳәа лгәалалыршәоит Нанули.

Ажәқәа рбара, унапаҿы аагара уадаҩуп, рыгәшәымшә аҳәашьа уақәымшәар ахш урҭом, лҳәоит лара. Дәрыԥшь ақыҭан ҳахьықәынхо арахә рбара уадаҩуп, ҳәа дахашшаауеит аԥшәма.

"Ажәқәа зегьы ирзыхьаӡом, рнапаҿы иааиӡом, унацәкьарақәеи, умахәҿи ӷәӷәазар ауп. Аҳәыс ианыхәыҷу акыкақәа ҩба азынсыжьуеит, еиҳа иандухалак акы. Зханшьалара уадаҩу арахә агәар иҭасаргылом. Иҵыгьо, уведра иҭаԥало иҟоу ажә, уи адкылара аҭахӡам. Ажә ҭынчӡа игыланы иухьозар ауп. Аӡынра ажәгәара иҭакны иҳамоуп. Ус ахкаара ҳәа акгьы ҳамаӡам. Ахш бзианы исырҭарц афатә рыгсыжьӡом. Аҭәеи аԥҳәи еицҵаны ирысҭоит", — ҳәа лҳәоит лара.

Ажә анхьалакгьы, мчыбжьык ахш лыдылкылаӡом, нас ианрымшьароу аԥшьашьа аҽны илныҳәоит. Ажәқәа рынцәахәы Жәабран "шәрахәымшхааит" ҳәа дрымҵаныҳәоит. Нас ахш лыдылкылоит ацыр алҭар, илыршыр ҟалоит, амцахь иналгоит, аџьыка алыркуеит. 

"Ажәқәа рхьара асааҭ быжьба рзы салагоит. Исыдыскылаз ахш зегьы сраӡоит, уи ашьҭахь сыхш аӡхьарша асҭоит, ахшақаҭәара ҵасӡам ҳәа рҳәоит. Ашьҭахь сыхш ацыр асҭоит, иара уигьы сара схала иҟасҵоит. Ажә аца сырҩоит, абанка ду аҟны ахыз аҵасҭәоит, аҿыш цырақәа ҟасҵоит иарцаҳә-цаҳәоит ҳәа, алаҳа амахәқәа хԥа ахәыҷқәа ҭасыршәоит — иарџьбароит ҳәа иԥхьаӡаны, аџьыкхыш асҭоит. Хлитрак ацыр ҩымыз исызхаӡом, аҿыц ҟасҵоит. Ацыргьы ахш исымоугьы азԥхьагәаҭаны блала иҟасҵоит, акгьы  сзаӡом", — хәа акәама-ҵамарақәа еиҭалҳәоит Нанули.

Ахш ацыр анасҭалак сааҭк сыԥшуеит, ацыр иакозар ҳәа, уи аамҭазы ашәха еилалҵоит.

"Ахш ацыр анасҭалак знык-ҩынтә сахәаԥшны сцоит, иаку иамку ҳәа игәаҭаны. Ианаклакгьы ахырҵәы еиԥш ибаҟаӡа иҟалоит. Ианыманшәалам ахш ацыр акӡом. Егьараан исыхьхьеит иманшәаламкәа. Ашәаӡа хысхаанӡа, ашәха еиласҵоит", — ҳәа ацылҵеит лара.

Афотосахьақәа шәрыхәаԥшыр ҟалоит абра

Авидеонҵамҭа шәахәаԥшыр ҟалоит абра

Ашәха аилаҵаразы ачуан аӡы рацәамкәа инҭаҭәаны амца иақәыргылатәуп. Аӡы аиларшра рацәаны иҟалом, избан акәзар зынӡа ашә тыруа иҟалар алшоит, еиламларгьы ҟалоит. Нанули лажәақәа рыла, шаҟа шықәса ахшлых ҟалҵо ашә узымфо лнапаҿы имааиуа иҟамлацт.

— Сымш асааҭ фба рзы иалагоит. Саныҩагылалак, сныҳәа-ныԥхьаны акәтқәа акрырҿаҵаны иоусыжьҭуеит, нас сырахә рахь сдәықәлоит.

— Ашьыжьтәи акаҳуа анбашәыжәуа?

— Акаҳуа уамак сазгагам, акрымфакәа акаҳуа сыжәӡом. Ажәхьара еиҳа исҭахуп акаҳуа ыжәуа ацәажәара аасҭа, лҳәеит Нанули Кәыҵниа-Кәакәасқьыр ҳцәажәар хырқәшо.

Атемақәа:
Иҟаҵоуп Аԥсны (22)

Ихадоу атемақәа