ГАГРА, мшаԥымза 27 — Sputnik, Роберт Џьопуа. Аԥсны Аминистрцәа Реилазаара анҭыҵтәи реилатәараан Аԥсны Аҩныҵҟатәи аусқәа рминистр Аслан Кобахьиа иҳәеит аҩныҵҟатәи аусқәа рраионтә Усбарҭақәа русзуҩцәа лаҵарамза 1 инаркны еиҳа ирӷәӷәоу аусуратә режим ахь ииасуеит ҳәа.
"Ауаа рырацәара инадҳәаланы ҳусурагьы еиҳа иҳарӷәӷәароуп, аҩныҵҟатәи аусқәа рраионтә Усбарҭақәа русзуҩцәа лаҵарамза 1 инаркны еиҳа ирӷәӷәоу ҩ-сменакны иҟоу аусуратә режим ахь ииасуеит. Даҽакала изалшом. Ҳтәылауааи ҳасасцәеи ршәарҭадара еиҿкаатәуп. Атуризм иаҳнаҭоит алшара аҳәынҭқаррагьы атәылауаагьы афеида роура", — иҳәеит Кобахьиа.
Аминистр иажәақәа рыла аминистрра ишьақәырӷәӷәоу аплан ала русура мҩаԥыргалоит. Аҵакы аманы ишьоит аминистррақәа реинырра.. Иара убасгьы дазааҭгылеит амилициа аусзуҩцәа рымаҭәа ишахәҭоу еиԥш еиҿкаазар шакәу, автоинспекциаа ракәзар аҳәаанырцәтәи амашьынатә номерқәа змоу автотранспорт аанкылара азин шрымам.
Аилатәараҟны иқәгылаз Аҭагылазаашьа ҷыдақәа рминистр ихаҭыԥуаҩ Тигран Делибалтиан иҳәеит 2016 шықәса рзы атәылаҟны быжьҩык ауаа шӡааҟәрылаз. Иара убри аан иазгәеиҭеит АҶА аусзуҩцәа уахи-ҽни амшын аҟны ахылаԥшратә уснагӡатәқәа шымҩаԥырго, аха Аԥсны аплиажтә зонақәа реиҳарак рҟны ашәарҭадара анормақәа ишрықәныҟәам.
Аилатәара мҩаԥысуан атәыла Ахада Рауль Ҳаџьымба ихантәаҩрала. Аилатәара иалахәын Аԥыза-министр Беслан Барцыц, ихаҭыԥуаа Беслан Ешба,
Аслан Кобахьиа, Дмитри Сериков, аминистрцәа, аҳәынҭеилакқәа рхантәаҩцәа, араионқәеи ақалақьқәеи рхадацәа.
