09:55 22 Ԥхынгәы 2017
Аҟәа+ 23°C
Ишиашоу ицо аефир
Аԥсны Ахәаахәҭра-ааглыхратә палатеи Ливантәи ачерқьесцәеи Аусеицуразы Аиқәшаҳаҭра рнапы аҵарҩит

Аусеицуразы Аиқәшаҳаҭра рнапы аҵарҩит Аԥсны ААПеи Ливантәи ачерқьесцәеи

© Sputnik / Томас Тхайцук
Аԥсны
Икьаҿу ахьарԥш аиура
1201

Аҟәа, лаҵарамза 11 рзы имҩаԥысит Аԥсны Ахәаахәҭра-ааглыхратә палатеи Ливантәи ачерқьесцәеи злахәыз апресс-конференциа. Апресс-конференциа хыркәшахеит аусеицураз Аиқәшаҳаҭра анапаҵаҩрала.

АҞӘА, лаҵарамза 11 – Sputnik, Бадри Есиава. Аҟәа, лаҵарамза 11 рзы имҩаԥысит Аԥсны Ахәаахәҭра-ааглыхратә палатеи Ливантәи ачерқьесцәеи злахәыз апресс-конференциа. Апресс-конференциа хыркәшахеит аусеицураз Аиқәшаҳаҭра анапаҵаҩрала. Аиқәышаҳаҭра рнапы аҵарҩит Аԥсны Ахәаахәҭра-ааглыхратә палата аиҳабы Геннади Гагәылиеи Ливан иҟоу ачерқьесцәа Рассоциациа ахантәаҩы Сариа Абдельраззаки.

"Ҳара иаҳҭахуп Ливан ашәқәа рзааҳартыр Аԥсны аиҿкаарақәеи аусҳәарҭақәеи. Ҳнапы зҵааҩыз адокумент раԥхьатәи шьаҿоуп абри аус аҟны. Ԥхьаҟа уи иацҵахоит ҳәа агәра згоит", — иҳәеит Гагәылиа.

Ливантәи жәларбжьаратәи аменеџьмент ауниверситет адоктор, Ливан иҟоу ачерқьесцәа Рассоциациа ахантәаҩы Сариа Абдельраззак Аԥсны ирзыҟарҵаз адкылара даара агәахәара лнаҭеит. Лара иазгәалҭеит Аԥсны аасҭа иԥшӡоу атәыла уаанӡа ишылымбацыз.

"Сара еиуеиԥшым атәылақәа сырҭаахьеит, аха асеиԥш иҟоу асирра сымбацызт. Амиллионқәа зықәхарџьу Дубаигьы Аԥсны иснаҭаз анырра снамҭеит", — лҳәеит лара.

Ҩышықәса ирықәуп Абдельраззак Аԥсны ахаҭарнакра луеижьҭеи Ливан. Лара лажәақәа рыла иазыԥхьагәаҭоуп аконференциа ду аиҿкаара, уахь инаԥхьахоит аԥсуа делегациагьы.

Аус адулара иаҿуп абри атәылаҟны Аԥсны аофициалтә хаҭарнакра аартра азҵаара.

Ассоциациа уаанӡатәи ахантәаҩы Риад Абдельраззак, Сариа лаб, иазгәеиҭеит Аԥсныҟа лассы-лассы аара шигәҭаку, еиҳа еизааигәоу аизыҟазаашьақәа раԥҵаразы.

Ливан аԥсуаа нхома ҳәа апресс-конференциаҿы ирҭаз азҵаара аҭакс иҳәеит урҭ уа рацәак шыҟам.

Ассоциациа атуризм аҟәша аиҳабы Билал Мельхем иҳәеит, Аԥсныҟа аара адагьы араҟа аанхарагьы шигәаԥхо. Иара иазгәеиҭеит ареспублика атуризм аганахь ала алшара дуқәа шамоу, иара убри аан авизақәа рызҵаара аӡбра шаҭаху.

"Аԥсны атуризм аҿиара аиуроуп. Ари аусхк алагалақәа аҭатәуп", — лҳәоит Сариа Абдельраззак.

Аиқәшаҳаҭра анапаҵаҩра ашьҭахь асасцәа ирыҭан агәаларшәагатә ҳамҭақәа. Ливантәи аделегациа Геннади Гагәылиа ачерқьесцәа Рассоциациа аҳаҭыртә диплом ианаршьеит.

Ихадоу атемақәа