АҞӘА, лаҵарамза 16 – Sputnik, Бадраҟ Аҩӡба. Аубыхцәа ирызку афильм шҭырхуа атәы далацәажәеит аубых бызшәа здыруаз аҵыхәтәантәи ацынҵәарах Тевфик Есенч имоҭа Зели Бурџьу Есенч, лаҵарамза 16 рзы Аԥсны арепатриациаз аҳәынҭеилакы аҟны аиԥылараан.
Зели Бурџьу Есенч ҭырқәтәылатәи ателеканал TRT аҟны режиссерс аус луеит. Аубыхцәа ирызку афильм аҭыхра лара лгәаҳәарақәа иреиҳауп.
"Ара сыҟазаара агәахәара ду снаҭоит. Уажә зҭыхра саҿу афильм акыршықәса раԥхьа зыԥсадгьыл нзыжьыз сыжәлар ирызкуп", ҳәа еиҭалҳәоит лара.
Тевфик Есенч ҭабуп ҳәа ахылҳәааит илзыҟаҵаз азхьаԥшразы, илҳәеит Аԥсни Нхыҵ Кавкази реимадара еиԥҟьара рмоур шакәу.
"Лабду иоуп иҵыхәтәантәины абызшәа здыруаз. Франциатәи аҵарауаҩ Жорж Диумезиль абри атәы аниаҳа Ҭырқәтәылаҟа дааны Есенч Франциаҟа дигеит. 30 шықәса инарзынаԥшуа Есенч иҟынтәи аубых бызшәа аниҵон", — иҳәеит ашәҟәыҩҩы Ҳаири Қәҭарба.
Аиԥылара алахәылацәа иҭаҩыз Тевфик Есенч ибжьы иазыӡырҩит. Иара уа убых бызшәала дцәажәон, ашәа иҳәон.
"Сабду ахаангьы Аԥсныҟа аара иҭахын. Иара уи илымшазаргьы, ибжьы аԥсуа дгьыл иқәҩит", — лҳәоит Есенч.
Тевфик Есенчи афранцыз ҵарауаҩ Жорж Диумезили аубых бызшәа аграмматика аус еицадырулеит. Иара иоуп Баграт Шьынқәба ироман "Ацынҵәарах" афырхаҵа дзыҿирԥшызгьы.
