15:59 16 Ԥхынҷкәын 2017
Аҟәа+ 14°C
Ишиашоу ицо аефир
Ельвира Арсалиаԥҳа ансамбль Россия алахәылацәа лыдылкылеит

Ельвира Арсалиаԥҳа ансамбль "Россия" алахәылацәа лыдылкылеит

© Sputnik / Томас Тхайцук
Аԥсны
Икьаҿу ахьарԥш аиура
3710

Ансамбль "Россия" акультуратә сезон "Россия-Абхазия 2017" аҳәаақәа ирҭагӡаны, раҧхьаӡа акәны Аҧсны иқәгылараны иҟоуп. Ансамбль азҧхьагәаҭа Аҧснытәи ақалақьқәа ҩба – Аҟәеи Очамчыреи рҿы аконцертқәа ҩба рыла ишьақәгылоуп.

АҞӘА, нанҳәа 25– Sputnik, Асида Кәыҵниаԥҳа. Аԥсны Акультура аминистр Ельвира Арсалиаԥҳа Лиудмила Зыкина лыхьӡ зху аҳәынҭқарратә академикатә аурыс жәлар рансамбль "Россия" алахәылацәа лыдылкылеит ахәаша, нанҳәа 25 рзы.

Аиԥылараан Акультура аминистри ансамбль асахьаркыратә напхгаҩы Дмитри Дмитриенкои алацәажәеит Аԥсни Урыстәылеи рыбжьара агастрольқәа рымҩаԥгара азҵаара.

"Ансамбль Аҟәеи Очамчыреи ишаақәгылалак, Аԥснытәи аҳәынҭқарратә капелла ҭак ҳасабла Москва, Амузыка Аҩнаҟны аконцерт мҩаԥысраны иҟоуп", — лҳәеит Ельвира Арсалиаԥҳа.

Лара иара убасгьы иазгәалҭеит амилаҭ ахаҭара еиқәырхаҩны иҟоу амузыкатә коллективқәа реиқәырхареи рырҿиареи аҵак ду аманы ишыҟоу.

"Адунеи зегьы аҟны амузыкатә традициақәа аинтерес рыҵаны иҟоуп. Дара иргәылаӡҩоуп иахьыҿиаз атәыла акультура. Шәколлектив Аԥсныҟа аарагьы баша-маша иҟалаз акакәӡам. Ҳара ибзиаӡаны еилаҳкаауеит асеиԥш иҟоу ансамбльқәа рҵакы", — лҳәеит аминистр.

Лиудмила Зыкина лыхьӡ зху ансамбль асахьаркыратә напхгаҩы Дмитри Дмитриенко иазгәеиҭеит дара Аԥсны уаанӡа ишықәымгылацыз, рыгәқәа хыҭхыҭуа уи ишазыԥшу.

"Ҳара Аԥсны аԥшӡара ҳаҭҟәеит. Ауаа рысасдкылашьа акәзар еиҳагьы иаҳгәаԥхеит. Ишәыдаагало апрограммагьы аинтерес аманы иҟоуп. Аминистри ҳареи ҳаицәажәара ашьҭахь сгәы иаанагоит ари Аԥсныҟа ҳаара иалагамҭоуп ҳәа", — иҳәеит иара.

Нанҳәамза 25, асааҭ 17:00 рзы, Очамчыра ақалақь, Р. Ҵәыџьба ихьӡ зху акультура Аҩны аҿы, нанҳәамза 26, асааҭ 18:00 рзы, Р. Гәымба ихьӡ зху Аҧснытәи аҳәынҭқарратә филармониа аҿы Аҧсны Аҳәынҭқарра ахьыҧшымра жәларбжьаратәи азхаҵара азгәаҭара иазкны Лиудмила Зыкина лыхьӡ зху аҳәынҭқарратә академикатә аурыс жәлар рансамбль "Россия" аконцертқәа мҩаҧысраны иҟоуп.

Лиудмила Зыкина лыхьӡ зху аҳәынҭқарратә академикатә аурыс жәлар рансамбль "Россия" – Урыстәыла адагьы адунеи иахьаҵанакуа аурыс ашәа аларҵәареи аурыс жәлар ринструментқәа ҟазарыла рырҳәареи знапы алаку иналукааша аколлективқәа иреиуоуп.

1977 шықәса рзы Асовет Еидгыла аминистрцәа Реидгыла аӡбамҭа ала иаҧҵаз ансамбль "Россия" агәазҭаҵаҩыс даман аурыс шәаҳәаҩ дуӡӡа, Асовет Еидгыла Жәлар рартистка Лиудмила Зыкина.

Ихадоу атемақәа