03:47 21 Абҵара 2017
Аҟәа+ 16°C
Ишиашоу ицо аефир
Государственный молодежный театр.

Апиеса "Ҳаԥсыуаауп, Ҳаԥсыуаа" ала аҿар ртеатр асезон ҿыц аанартит

© Sputnik / Томас Тхайцук
Аԥсны
Икьаҿу ахьарԥш аиура
11 0 0

Аԥсуа ҳәынҭқарратә аҿар ртеатр аиҳабы Аслан Еныкь Sputnik иазеиҭеиҳәеит атеатралтә сезон ҿыц иалагӡаны ахәаԥшцәа ирызнарго аспектакльқәа.

АҞӘА, цәыббра 15 – Sputnik, Бадраҟ Аҩӡба. Аԥсуа ҳәынҭқарратә аҿар ртеатр Самсон Ҷанба ихьӡ зху Аԥсуа адраматә театр асценаҟны Шоҭа Ҷкадуа ипиеса "Ҳаԥсыуаауп, Ҳаԥсыуаа" (Акьанџьа) ықәдыргылеит. Уи алагьы атеатралтә сезон ҿыц аадыртит.

"Асезон ҿыц анаауртуа, иҿыцу аспектакль умазар бзиоуп, аха ҳара ус еиԥш иҟаҳҵоит, асезон анааҳартуа, ианаҳаркуагьы символра зуа аспектакль ҳамоуп "Ҳаԥсыуаауп, Ҳаԥсыуаа" захьӡу. Уи символс иҟаҳҵеит избанзар, Аԥсуа ҳәынҭқарратә аҿар ртеатр анаԥаҳҵоз, аартра аныҟаз абри аспектакль ала иааҳартит", — иҳәеит Аԥсуа ҳәынҭқарратә аҿар ртеатр аиҳабы Аслан Еныкь.

Аспектакль апролог ацуп, уи иаазыркьаҿны аҿар ртеатр аартра аҭоурых иарбоуп, азгәеиҭеит уи.

"Ҳара иҿыцны ҳалагоит Анзор Мықәба идрама "Қьалышьбеи" ала иқәыргылоу аспектакль арбара. Уи еицырдыруа аԥсуаа раҳ иҭоурых ауп", — иҳәеит Еныкь.

Аслан Еныкь иазгәеиҭеит ари адраматә ҩымҭа ҩуижьҭеи акыр шыҵуа, Аџьынџьтәылатәи еибашьра 1992-1993 ҟалаанӡагьы ишцәырҵхьаз, аха иахьа уажәраанӡа аӡәгьы ишықәимыргылацыз.

Уи иҳәеит ақәыргылаҩ Аԥсны Жәлар рартсит Шьалуа Гыцба шиакәу, аспектакль ақәыргылара аан уи аҩымҭа автор Анзор Мықәбеи иареи изныкымкәа ишеиқәшәахьоу, ақәыргылара иадҳәалоу акәамаҵамақәа разгәаҭаразы.

Аслан Еныкь иажәақәа рыла, аспектакль ҿыц "Қьалышьбеи" ықәыргылахоит ашықәс ҿыц ааиаанӡа. 

Аспектакль "Ҳаԥсыуаауп, Ҳаԥсыуаа" раԥхьаӡакәны иқәиргылеит арежессиор Дырмит Кәартаа, ароль хада нарыгӡон Софа Агәмаа, Амиран Ҭаниа, Заира Анқәаб-Ермолова. Апиеса ахаҭа акәзар, аԥсуа ҭаацәаратә еизыҟазаашьақәеи, аҭаацәараҿы имҩаԥысуа ауадаҩрақәеи ирызкуп.

Аԥсуа ҳәынҭқарратә аҿар ртеатр аԥҵан 2014 шықәсазы. Атеатр аилазаараҿы ихәмаруа актиорцәа Аԥснытәи аҳәынҭқарратә университет афилологиатә факультет "актиортә ҟазара" аҟәша аушьҭымҭацәа роуп, дара аус руан Софа Агәмааԥҳа напхгара зылҭоз атеатр "Аамҭа" аҟны.

 

 

Ихадоу атемақәа