АҞӘА, цәыббра 21– Sputnik, Сарая Кәарацхьелиаԥҳа. 36-тәи асезон иалагӡаны атеатр асценаҟны иқәыргылан 107 спектакли 10 концертки. Абри атәы апресс-конференциаҟны еиҭеиҳәеит Фазиль Искандер ихьӡ зху аурыс драматә театр адиректор хада Иракли Хынҭәба.
"Ҳтеатр аҟны ес-мчыбжьа хԥа-хԥа спектакль ықәҳаргылон. Афишақәа аспектакль ацәыргараанӡа ҩымз шыбжьаз икнаҳҳауан. Ҳлагалақәа 14-нтә еизҳаит. Апремиерақәа раан абилеҭқәа зегьы ҳҭиуеит. Сынтәа "Примадонны" апремиера ҳаман. Уи 12-нтә азал рҭәны ауаа еизнагон", — иҳәеит Хынҭәба.
Иара убасгьы адиректор хада иажәақәа рыла РУСДРАМ Аԥснытәи атеатрқәа рыбжьара ахатәы официалтә саит амоуп.
"Асаит урыстәылатәи ҳколлегацәа даара ибзиоуп ҳәа ахырҳәааит. Иара аусура иалагеит 2017 шықәса жәабранмзазы. Иара убри амзазы иара иаҭааит 20 000-ҩык рҟынӡа ауааԥсыра", — иҳәеит иара.
Хынҭәба иара убасгьы иазгәеиҭеит РУСДРАМ 2017 шықәса рзы ишаланагалаз абилеҭқәа релектронтә ҭира.
"Абилеҭқәа онлаин рыҭира Аԥсназы иҿыцуп. Уажәазы 8 % иреиҵамкәа ахәаԥшыҩцәа уи аформа рхы иадырхәоит. Урҭ еиҳа-еиҳа ирыцлоит", — иҳәеит иара.
Аурыс драматә театр аҟны 36-тәи атеатртә сезон хыркәшахеит цәыббра 21 рзы аспектакль "Хә-хәылԥазык" ала.
