АҞӘА, ԥхынҷкәын 11 – Sputnik, Бадраҟ Аҩӡба. Атәыла аԥсаӡ хада ҵыԥх игылаз аасҭа еиҳагьы иԥшӡахоит ҳәа Sputnik акорреспондент изеиҭеиҳәеит Аҟәа ақалақь асахьаҭыхыҩ хада Руслан Габлиа.
"Аҵла дуқәа зегьы лашаркхоит. Аԥсаӡ ԥхынҷкәын жәохә рзы ирхиахоит. Иара аура 18 метра иҟоуп. Ҵыԥх уажәааны амшқәа цәгьан, уи ҳазхәыцны сынтәа заанаҵы аргылара ҳалагеит", — иҳәеит иара.
Аҳҭнықалақь Ахадара аӡбрала есышықәса ахәмаргақә ҿыцқәа ааҳхәоит аԥсаӡ архиаразы ҳәа азгәеиҭеит асахьаҭыхыҩ.
"Ҳара иаҿаҳҵеит ахәмарга ҿыцқәа. Лассы иааргараны иҟоуп. Ҵыԥхтәиқәагьы еилаҳаҟәшәаауеит, иреиӷьқәоу аанҳажьуеит", — иҳәеит Габлиа.
Асахьаҭыхыҩ хада ишиҳәаз ала ԥхынҷкәын жәохә рзы аԥсаӡ ишахәҭоу еиҿкаахоит.
Уи адагьы ашҭа ду аҟны изызҳауа ачықьқәа зегьы алашарақәа рыла ирхиахоит. Аԥсаӡ акәша-мыкәша уахынла акыр иссирхоит ҳәа азгәеиҭоит Руслан Габлиа.
