АҞӘА, ԥхынҷкәын 29 – Sputnik, Бадри Есиава. Ареспубликатә аимҳәадухәышәтәырҭа диспансер, ашықәс ҿыц аныҳәа аламҭалазы иаартын, ԥхынҷкәын 29 рзы.
Аԥсны Агәабзиарахьчара аминистр Ҭамаз Ҵахнакьиа иажәақәа рыла аиҭашьақәыргыларатә усурақәа мҩаԥысуан 2014-2017 шықәсқәа ирҭагӡаны. Ареспубликатә биуџьет аҟынтәи арҭ аусурақәа ирзоужьын 7 миллион мааҭ инарзынаԥшуа.
"Ари ахҭыс ҳара акрааҵуан ҳазыԥшижьҭеи. Ҳара ҳзы ари адиспансер акрызҵазкуа усҳәарҭаны ишьоуп. Ишыжәдыруа еиԥш аимҳәаду асоциалтә шәарҭара змоу чмазароуп. Уи иахьа Аԥсназы актуалра аманы иҟоуп. 2017 шықәсазы мацара ари ачымазара зцәа иалоу 12-ҩык ауаа аарԥшуп. Уи иаанаго, абри аиԥш иҟоу адиспансер ачымазцәа рзы ахәшьара ду зҵоу акоуп ҳәоуп", — иҳәеит аминистр.
Иагьазгәеиҭеит адиспансер аҟны ишгыло 120 каруаҭ, ишаарту ареанимациатә палата змоу ахирургиатә блок.
2018 шықәсазтәи абиуџьет аҳәаақәа ирҭагӡаны аимҳәаду иазку апрограмма ҷыда аԥҵахоит, аҳәынҭқарра ачымазцәа еиқәнаршәараны иҟоуп хәшәыла.
"Иара убасгьы, ҳареи аиҿкаара "Иҳәаадоу аҳақьымцәеи" амеморандум ҳнапы аҵааҩит. Уи инақәыршәаны ҳчымазцәа иахәҭаны иҟоу ахәышәтәра еиҳа имарианы рыҭара алыршахоит", — иҳәеит Ҭамаз Ҵахнакьиа.
Апарламент адепутат Алхас Џьынџьал иазгәеиҭеит, Аԥсны амедицина маҷ-маҷ акәзаргьы, ҳаамҭа иақәшәо аформақәа аиуа ишалагаз.
Ақалақьтә хәышәтәырҭа аҳақьым хада Виачислав Абыхәба далацәажәеит Николаи Смецкои Аԥсны раԥхьатәи аимҳәадухәышәтәырҭа ширгылаз атәы.
Аҳақьым Анатоли Акшба иҳәеит апациентцәа рацәаҩны астационар аҟны аҽыхәышәтәра ишақәшаҳаҭымхо, убри азы иара игәаанагарала урҭ азакәан шьаҭа аҭаны мчыла ахәышәра иахыжьлатәуп, избанзар аимҳәаду ауаа рзы ишәарҭаны ишьоуп. Убри аганахь ала иаарласны иазырхиахоит аимҳәаду амаҵзуразы азакәан.
Ареспубликатә диспансер адиректор Џьумбер Гоԥиа ҿыц иаарту адиспансер ахь инеиԥхьеит аҭааҩцәа, асасцәа, аартра иалахәыз зегьы.
Адиспансер аколлектив 88-ҩык шыҟоугьы атерапевтцәа рзымхара ыҟоуп. Абри ашықәс иалагӡаны аҽыхәышәтәра иахысуан 264-ҩык ачымазцәа. Урҭ рыгәҭа ахәыҷқәа ыҟам. Иахьазы адиспансер иахәҭаны иҟоу хәшәыла еиқәыршәоуп.
