АҞӘА, цәыббра 29 — Sputnik, Бадраҟ Аҩӡба. Аԥснытәи аҳәынҭқарратә филармониа артистцәа Лука Гаделиеи Кристина Ешԥҳаи цәыббра 30 рзы Саратовтәи аконсерваториа Азал ду аҟны иқәгылараны иҟоуп. Абри атәы ҳаиҳәеит Лука Гаделиа ихаҭа.
"Агәахәара ду ҳнаҭоит ҳақәгылара ҳажәлар рныҳәа ду иахьақәшәо. Абри амш аҽны ҳара ҳҽазаҳшәоит иналкааны ахӡыргара. Аклассика адагьы аԥсуа ашәақәеи ауарӷан азы арҿиамҭақәеи ҳконцерт иалалоит", — иҳәеит Лука Гаделиа.
Амузыкантцәа рыпрограмма "Аепохақәа рдиалог" иалалоит еиуеиԥшым акомпозитортә школқәа рмузыка.
"Ҳара ари асценаҟны ҩынтәуп ҳақәгылоижьҭеи. Иара Урыстәыла иреиҳабӡоу консерваториоуп. Араҟа азыӡырыҩцәа даара иазыҟаҵоуп. Агәахәара ҳнаҭоит дара, хаԥышәала Пицундатәи ауарӷан аиубилеитә шықәса рхы аладырхәырц ахьырҭаххаз", — иҳәеит Гаделиа.
Аԥсуа артистцәа Лука Гаделиеи Кристина Ешԥҳаи Саратовтәи аконсерваториа Азал ду аҟны имҩаԥыргоит Пицундатәи ауарӷан 40-шықәса ахыҵра иазыркыз аконцерт.
