АҞӘА, мшԥ 25 – Sputnik, Роберт Џьопуа. Аԥснынтәи асахьҭыхҩы Екатерина Гуськова аиԥхныҩлатә машьынақәа рсериа аҟынтә лперсоналтә цәыргақәҵа аатит Шәача, Олимпиатә парк, иалагаз аклассикатә ралли азы Урыстәыла ахраҿа иаарту аетап аҳәаақәа ирҭагӡаны. Абри атәы аҭыԥантәи иааишьҭуеит Sputnik акорреспондент.
"Шәача автодром аҟны ацәыргақәҵа аиҿкаара аидеиа сызцәырҵит Урыстәыла "Формула 1" Агран-при анызба ашьҭахь. Агран-при азы аусумҭақәа азсырхиеит, раӷьырак еицырдыруа аиԥхныҩлаҩцәа рнапы рыҵаҩуп, 2014 шықәса ачемпион Лиуис Хемилтон (Lewis Hamilton) уахь дналаҵаныуи сара зегь ирылыскаауа спортсменуп. Урыстәыла Формула 1 "Агран-при" иаҳа аинтерес змаз ацыԥҵәахақәа рҟынтәи асахьақәа ҭысхын Урыстәыла "Формула 1" аиҿкааҩцәа рахь ашәҟәы сыҩит, иааиуа Урыстәыла имҩаԥгахо "Формула 1" Адунеи ачемпионат аҟны сусумҭақәа рцәыргара саҳәеит. Аиҿкааҩцәа сажәалагала аинтерес рызцәырнагеит, ссахьақәагьы иахьатәи аиндаҭлараҿы ицәырызгартә алшара сырҭеит", – лҳәеит асахьаҭыхҩы.
Ацәыргақәҵа аҟны аҿыханҵеи, аграфикеи ахырхарҭақәа рыла иҭыху 36 ԥҵамҭа цәыргоуп.
Аҭааҩ Иван Усанов аԥсуа сахьаҭыхҩы графикала иҭылхыз асахьақәа иалкааны дрыхцәажеит.
"Аҿыхынҵа сазҿлымҳауп азы ралли аҟны ацәргақәҵа анызба сеигәырӷьеит. Аграфикатә усумҭақәа даара аинтерес рыҵуп", – иазгәеиҭеит Усанов.
Екатерина Гуськова Аҟәатәи асахьаҭыхратә школ далгеит 2000 шықәсазы, 2012 шықәсазы – Аԥснытәи аҳәынҭқарратә университет апедагогикатә факультет асахьаҭыхратә ҟәша. Екатерина Гуськова лсахьаҭыхратә усура ахь иаҵанакуеит 10 инареиҳаны ацәыргақәҵақәа. 2015 шықәса хәажәкыра Аҟәа "Guskova Ekaterina" VI-тәи лперсоналтә цәыргақәҵа мҩаԥган, уаҟа асахьаҭыхҩы қәыԥш бжьы-шықәса ирҭагӡаны еизылгаз лусумҭақәа 100 цәырган.
