АҞӘА, жьҭаара 4 – Sputnik. Иааидкыланы абжьыҭира рхы аладырхәит 2,3 миллионҩык Каталониа ауааԥсыра. Хара имгакәа Каталониа Испаниа ишадҵуазы аҳәамҭа ҟанаҵараны иҟоуп иҳәеит аженералитет аиҳабы Карлес Пучдемон. Абри атәы аанацҳауеит РИА Новости, ателерадиокорпорациа Би-би-си адыррақәа шьаҭас иҟаҵаны.
Пучдемон иажәақәа рыла "Каталониа аиҳабыра абри амчыбжь анҵәамҭаз мамзаргьы иааиуа амчыбжь алагамҭаз аҳәамҭа аҟаҵара рыгәҭакуп".
Иара ишиҳәаз ала Мадриди автономиа аиҳабыреи иахьазы аинырра рымам.
Жьҭаара 1 азы Каталониа ахьыԥшымразы ареферендум мҩаԥган. Алхырҭатә ҭыԥқәак рҟны алхыҩцәеи аполициеи рыбжьара аидысларақәа ҟалеит. Иҟоуп ахәрақәа зауз.
Испаниа акрал Фелипе VI ижәлар рахь иҟаиҵаз аҳәамҭаҿ иазгәеиҭеит Каталониа аиҳабыра ареферендум амҩаԥгарала Испаниа акзаара ҵыршәааит ҳәа.
