АҞӘА, жьҭаара 11— Sputnik. Абри аамҭала ҩ-миллион мааҭ инареиҳаны зыҳәа ҟаҵан ҳәа аанацҳауеит ашьапылампыл азы Жәларбжьаратәи афедерациа (ФИФА) аиҿкаара аофициалтә саит аҟны.
Зегь раасҭа ирацәоуп Урыстәылатәи ашьапылампыл абзиабаҩцәа рҟынтәи азыҳәақәа ҳәа аҳәоит арелиз атекст аҿы. Иара убасгьы ирацәаҩуп Бразилиа, Мексика, Аргентина, США, Германиа, Колумбиа, Китаи, Израиль, Англиа рҟынтәи ашьапылампыл абзиабаҩцәа рахьтә азыҳәа ҟазҵаз.
Иааидкыланы абилеҭқәа рзы 90 000 зыҳәа ҟаҵоуп ахәмаррақәа рзы, афинал азы 132 000 билеҭ.
2018 шықәсазтәи Адунеи ачемпионат мҩаԥысраны иҟоуп рашәарамза 14 инаркны ԥхынгәы 15 рҟынӡа.
Атурнир ахәмаррақәа мҩаԥысраны иҟоуп: Москва, Санкт-Петербург, Калининград, Волгоград, Казань, Нижни Новгород, Самара, Саранск, Ростов-на-Дону, Екатеринбург, Шәача.
Иахьатәи аамҭазы адунеи ашьапылампыл азы ачемпионат иалахәхараны иҟоу акомандақәа 32 рҟынтәи 17 команда рыхьӡ шьақәырӷәӷәоуп:
Урыстәыла (ачемпионат аԥшәма), Бразилиа, Иран, Иапониа, Мексика, Бельгиа, Кореиа, Саудовтәи Аравая, Германиа, Англиа, Испаниа, Нигериа, Коста-Рика, Польша, Египет, Исландиа, Сербиа.
