АҞӘА, абҵара 13 — Sputnik. Змагнитуда 7,2 балл иҟаз адгьылҵысра ҟалеит Иран. Иара иахҟьаны рыԥсҭазаара иалҵит 160-ҩык рҟынӡа ауааԥсыра, аахақәа роуит 1,5 нызқьҩык. Абри атәы аанацҳауеит РИА Новости, ателеканал Press TV адыррақәа шьаҭас иҟаҵаны.
Багдад 204 километра инацәыхарани Керманшах ақалақь 104 километра инацәыхарани адгьылҵысра ҟалеит.
Ибгаз ахыбрақәа ауаа рацәа хырҩеит. Уажәы аԥшааратәи аиқәырхаратәи усурақәа мҩаԥысуеит. Иҟоуп ашәарҭа аԥсыҭбарақәа еиҳагьы еиҳахар алшоит ҳәа.
Иран ауааԥсыра 70 000-ҩык рҟынӡа хыҵакырҭада иаанхеит.
Аҭыԥантәи АИх ишазгәарҭо ала адгьылҵысра рныруан Ираки Ирани реиԥш егьырҭ аҳәынҭқаррақәа рҿгьы: Кувеит, ОАЕ, Израиль.
Арҭ атәылақәа рҟны машәыр ҟамлеит.
