АҞӘА, ԥхынҷкәын 11 — Sputnik. Сальвадор Собрал, аконкурс Евровидение-2017аиааиҩы игәы аоперациа азыруит ҳәа аанацҳауеит РИА Новости португалиатәи ателерадиоеилахәыра RTP адыррақәа ҵаҵӷәыс иганы.
Аоперациа мҩаԥысит ԥхынҷкәын 8 рзы. Амедикцәа ражәақәа рыла иара қәҿиарала имҩаԥысит, уажәшьҭа иаҭахны иҟоуп акраамҭатәи аиҭашьақәыргылара.
Португалиатәи ашәаҳәаҩ Сальвадор Собрал цәыббрамза анҵәамҭазы ахәышәтәырҭа дҭашәеит. Иара иконцертқәа зегьы ааникылеит, асценахь уаҳа дшымааиуазгьы аҳәамҭа ҟаиҵеит.
Сальвадор Собрал, Португалиа ахьӡала дықәгылан ашәаҳәаратә конкурс Евровидение-2017 аҟны, Киеве. Артист инеигӡеит ашәа Amar Pelos Dois ("Любви хватит на двоих").
