АҞӘА, ԥхынгәы 10 – Sputnik. Ахәыҷқәеи урҭ разыҟаҵаҩи аҳаԥы ихәыҵгоуп ҳәа аанацҳауеит РИА Новости ателеканал Spring News адыррақәа ҵаҵӷәыс иҟаҵаны.
Аҳаԥы иара убасгьы иҭыгоуп ахәыҷқәа рыԥшааижьҭеи дара ирыцҟоу ԥшьҩык аррамаҵзурауаа ҳәа аанацҳауеит РИА Новости.
Хыхь ихаргалаз ахәыҷқәа зегьы ахәыштәырҭақәа рахь инагоуп.
Арыцҳара ҟалеит рашәара 23 рзы. Аҳаԥы Тхам Луанг иҭалаз ахәыҷқәеи разыҟаҵаҩи иаалырҟьан аӡы ахьышьҭыҵыз иахҟьаны аҳаԥы ихәыҵахеит. Дара рыԥшааит жәамш рышьҭахь. Ахәыҷқәа рыԥсы ҭан аха рымчқәа акыр имаҷын.
Аҳаԥы иҭыргаз ахәыҷқәа ахәышәтәырҭақәа рахь инагоуп.
Аҳаԥаҿы иҷаԥшьоз аҳақьымцәа ишырҳәоз ала ахәыҷқәа ргәы каҳаны иҟам.
Аҳаԥы Тхам Луанг аҿаԥхьа иааиԥмырҟьаӡакәа игылан 13 цхыраара-ласы, иҷаԥшьон аҳақьымцәа.
Ацхыраара иалахәын шәҩыла аиқәырхаҩцәа.