Маи 9, 1995 шықәсазы Аџьынџьтәылатәи еибашьраҿы игаз Аиааира ду 50 шықәса ахыҵра аҳаҭыраза, Ашҭа Ҟаԥшь аҟны имҩаԥган апарад, уи иалахәын аветеранцәеи атыл аҟны аус зуази. Аиҿкааҩцәа ирҭахын еиҭахгьы иргәаладыршәарц аҭоурыхтә мшы - маи 9, 1945 шықәса. Убри азы уи амш шымҩаԥысҵәҟьа еиҭашьақәыргыланы иаԥылеит 50 шықәса рышьҭахь. Апарад аҟны ицәырган Аиааира Абираҟгьы.
Уи ашықәс инаркны Ашҭа Ҟаԥшь аҟны есшықәса имҩаԥыргоит апарад, аибашьратә техникада. 2008 шықәсазы ихацыркхеит атрадициа маи 9 апарад иалахәхарц Урыстәыла арбџьармчқәа иатәу аибашьратә техника.
Сынтәа акоронавирус апандемиа иахырҟьаны Аџьынџьтәылатә еибашьра Ду аҟны Аиааира 75 шықәса ахыҵра амшныҳәа арыцхә инахоуп. Лаҵара 9 рзы имҩаԥысыз апарад аҳаиртә хәҭоуп: Ашҭа Ҟаԥшь иахаԥыруеит 75 ҳаирплани вертолиоти. Аҳаиртә парад мҩаԥысуеит урыстәылатәи ақалақьқәа 47 рыҟни аҳәаанырцә иҟоу арратә базақәа рыҟни.
Урыстәыла ахада Владимир Путин анапынҵа ҟаиҵеит Москва имҩаԥысраны иҟаз Аиааира апарад аҽазыҟаҵара аграфик еиҭакзарц акоронавирус инадҳәаланы. Лаҵара 9 рзы имҩаԥгахараны иҟоуп аибашьцәа рбаҟақәеи рмемориалқәеи рымҵан ашәҭшьыҵәрақәа рышьҭаҵара, иҭахаз ргәаларшәара. Асааҭ 19.00 рзы минуҭктәи аҿымҭра мҩаԥгахоит.
Аԥсны ауаажәлар 55 нызқьҩык инареиҳаны Аџьынџьтәылатәи еибашьра иалахәын, урҭ рыҟнытә 17 нызқьҩык инарыцны изыхнымҳәит, 22-ҩык Асовет Еидгыла Афырхацәа ҳәа ахьӡ рыхҵоуп.
Аҿкы чымазара акоронавирус рцәа иалоуп ԥшьҩык Аԥсны атәылауаа ҳәа аанацҳауеит Ауааԥсыра акоронавирустә ҿкы рацәыхьчаразы аоперативтә штаб аҟнытә. Апандемиа ыҟоуижьҭеи Аԥсны акоронавирус рыхьхьан хҩык ауааԥсыра. Ҩыџьа ргәы бзиаханы Гәдоуҭатәи ахәышәтәырҭа хада аҟынтә рыҩныҟа ишьҭын, 1925 шықәсазы ииз аԥҳәыс бырг лыԥсҭазаара далҵит.
Акоронавирус иазку ажәабжьқәа зегьы шәрыԥхьар ҟалоит абра>>
Аџьынџьтәылатә еибашьра Ду аҿы аиааира иазку аҭыжьымҭақәа шәрыԥхьар ҟалоит абра>>