АҞӘА, жәабран 15 – Sputnik. Ацәыргақәҵатә зал хадаҿы иаатит Владислав Арӡынба ибаҟа апроект аконкурс азы аекспозициа. Аекспозициахь инагоуп аусумҭақәа хԥа.
Амонументалтә ҟазаразы Аҳәынҭқарратә комиссиа амаӡаныҟәгаҩ Ирма Цәеиԥҳа илҳәеит абаҟазы критерик шалкаамыз, архитекторцәа рхатә гәаанагара аадырԥшуан ҳәа.
"Концепциак ҟаҳамҵеит, архитекторцәа рхатә знеишьа аадырԥшуан. Апроекттә усумҭақәа хԥа ӡыргоуп", - ҳәа лҳәеит Цәеиԥҳа.
Аконкурсантцәа рыхьӡқәа ҳәамызт аусумҭа ахәшьара иаша аҭаразы.
"Апроектқәа рыхԥагь изтәыз рыхьӡ ҳәамызт, номерла иқәыргылан. Акомиссиа алахәылацәа рыхәшьара авторцәа рыхьӡқәа ирыдырҳәаломызт, аусумҭа ахаҭа акәын ахәшьара зырҭоз", - ҳәа лҳәеит лара.
Иара убасгьы Цәеиԥҳа илҳәеит Акультура аминистрра асаит аҿы онлаин-бжьыҭира шымҩаԥгахо: жәабран 15 асааҭ 18:00 инаркны жәабран 21, асааҭ 12:00 рҟынӡа.
"Изҭаху зегьы аусумҭақәа рбар рылшоит Акультура аминистрра асаит аҿы, рыбжьы рҭиир ауеит проектк азы. Ацәыргақәҵатә зал аҿы аекспозициа ҟалоит жәабран 21 рҟынӡа", - лҳәоит Цәеиԥҳа.
Владислав Арӡынба – аҵарауаҩ, аполитик, Аԥсны Раԥхьатәи ахада. Иара ареспублика ахадараҿы дгылан реиҳа иуадаҩыз аамҭақәа рзы, иахьатәи Аԥсны аҳәынҭқарра дашьаҭаркҩуп. 1989 шықәса рзы Владислав Арӡынба СССР жәлар рдепутатси СССР Иреиҳаӡоу Ахеилак адепутатси далхын. Аԥсны жәлар Рџьынџьтәылатә еибашьраан амилаҭ-хақәиҭратә қәԥара ахадараҿы дгылеит. 1994 шықәсазы Владислав Арӡынба Аԥсны ахадас далхын, 1999 шықәсазы аҩынтә раан Аԥсны ахадас дҟалеит.
Иналукааша аԥсуа политик, аҳәынҭқарра аргылаҩ Владислав Арӡынба иԥсҭазаара далҵит 65 шықәса дшырҭагылаз, хәажәкыра 4, 2010 шықәсазы.
Иара убас шәаԥхьар ҟалоит:
Владислав Арӡынба иажәеи иаамҭеи
Избанзар ажәлар игәра ргон: Арӡынба Аԥсны Иреиҳаӡоу Ахеилак ахантәаҩыс дшалырхыз