АҞӘА, жәабран 12 - Sputnik. Гәдоуҭа ақалақь аҟны унаӡаанӡа Дружба ҳәа иахьашьҭоу инхоз Ахра Ҵәыџьба жәабран 11 ауха иҟалаз амҩатә машәыр иахҟьаны иԥсҭазаара далҵит ҳәа ааицҳауеит иҭахаз игәыла, Sputnik акорреспондент Бадри Есиава.
"Иҟалаз амашәыр аҭагылазаашьа сара исыздырӡом. Амашәыр аныҟала ашьҭахь Ахра Гәдоуҭатәи ахәшәтәырҭахь днаган, аха еиқәырхара залыршамхеит. Иаргьы саргьы ҳхәыҷы аахыс ҳаибадыруан. Даара иааӡаз, аусура бзиа избоз ҷкәынын. Иара иҭынхеит зықәранаӡам хҩык ахшаара", - иҳәеит Есиава.
Амҩатә машәыр ҟалеит Гәдоуҭа ахәаша жәабран 11 ауха. Автомашьына Toyota Mark X амҩаҿықәан игылаз аҵла иасит.
Аиқәырхаҩцәа аҭыԥахь иаразнак инеит, атехника ҷыдала амашьына ԥҟаны аԥсҟы зкыз дҭыганы ахәшәтәырҭахь днаргеит.