АҞӘА, хәажәкыра 3 – Sputnik. Урыстәылеи Украинеи рделегациақәа аиҿцәажәарақәа аҩбатәи араунд иалагеит Белоруссиа Брест аоблост аҟны ҳәа аанацҳауеит РИА Новости Белоруссиа Адәныҟатәи аусқәа рминистрра шьаҭас иганы.
Ашәахьа, Белоруссиа имҩаԥысит урыстәыла-украинатәи аиҿцәажәарақәа. Урыстәылатәи аделегациа напхгара аиҭон атәыла ахада ицхырааҩ Владимир Медински. Уаанӡа, Украина ахада иофес аҟны ирҳәахьан "аиҿцәажәарақәа рыҟны ихадоу зҵаараны ишыҟоу Украина иаарласны ахымца аанкылареи арбџьармчқәа ралгареи". Аиҿцәажәарақәа рышьҭахь Зеленски иҳәеит, макьана Украина иаҭаху алҵшәа шыҟам.
Жәабран 21 азы Донецки Лугански жәлар рреспубликақәа Урыстәыла ахадарахь иҟарҵаз аҳәара инақәыршәаны Урыстәыла ахада арҭ ареспубликақәа рхьыԥшымра азхаҵаны жәабран 24 азы Украина абџьархыхразы арратә операциа ҷыда далагеит. Урыстәыла ахада иазгәеиҭеит, иҟалар зылшо ашьакаҭәараз иахьатәи украина анапхгара ишырхароу.
Урыстәыла атәылахьчара аминистрра аҟны ирҳәеит, аҭынч уааԥсыра ишрыламкьысуа атәы. Иазгәарҭеит, аруаа русура шеиԥдырҟьо, арратә инфраструктура, аҳаиртә хыхьчара хархәагақәа, арратә ҳаирбаӷәазақәа шракәу ааха зырҭо.