АҞӘА, хәажәкыра 10 – Sputnik. Лугансктәи Жәлар Рреспублика ахада Леонид Пасечник Аԥсны ахьыԥшымра азхаҵаразы Аусԥҟа инапы аҵеиҩит. Адокумент ахада иофициалтә саит аҿы икьыԥхьуп.
"Аӡбра сыдыскылоит: Аԥсны Аҳәынҭқарра исуверентәу, ихьыԥшыму ҳәынҭқарран азхаҵаразы. ЛЖәР ААР аԥснытәи аган алацәажәара мҩаԥнагароуп адипломатиатә еизыҟазаашьақәа рышьақәыргыларазы", – аҳәоит аусԥҟаҿы.
Пасечник абри аганахь ала иҟаиҵаз аҳәамҭаҿы иазгәеиҭеит "Аԥсни Лугански аиҩызаратә еизыҟазаашьа ӷәӷәақәа рыбжьоижьҭеи акыр шыҵуа".
"Аԥсны ауааԥсырагьы Донбасс ауааԥсыра реиԥш ибзианы ирдыруеит аԥсадгьыл ахьчара заҟа иуадаҩу, заҟа иуадаҩу аиаша адгылара. Ареспубликазы иуадаҩу аамҭазы Аԥсны Урыстәыла инашьҭарххны Лугансктәи Жәлар Рреспублика ахьыԥшымра азханаҵеит", - ҳәа иҳәеит Пасечник.
Хәажәкыра 9 азы Аԥсны Аҳәынҭқарреи Донецктәи Жәлар Рреспубликеи адипломатиатә еизыҟазаашьақәа рыбжьарҵеит анотақәа реимдарала.