АҞӘА, хәажәкыра 15 - Sputnik. Аԥсны ауааԥсыра COVID -19 азы атестқәа арҭеит 157-ҩык, урҭ рахьтә 58-ҩык аҿкчымазара шрымаз аадырԥшит ҳәа аанацҳауеит ауааԥсыра акоронавирус рацәыхьчаразы аоперативтә штаб.
Гәдоуҭатәи ахәшәтәырҭаҿы акоронавирус зыдбалаз 88 шықәса зхыҵуаз ахаҵа иԥсҭазаара далҵит.
Ари аамҭазы Гәдоуҭатәи араионтә хәшәтәырҭа хадаҿы ишьҭоуп 18-ҩык, рҭагылазаашьа бааԥсуп ԥшьҩык, ибжьаратәуп 14-ҩык. Аҟәатәи аинфекциатә хәшәтәырҭаҿы ирхәшәтәуеит акоронавирус зцәа иалоу 22-а, урҭ рахьтә жәаҩык рҭагылазаашьа уадаҩуп. Очамчыра ирхәшәтәуеит ааҩык, Гагратәи ахәшәтәырҭаҿы - 11-ҩык, урҭ рахьтә аӡәы иҭагылазаашьа уадаҩуп. Тҟәарчалтәи ахәшәтәырҭаҿы ԥшьҩык ачымазцәа шьҭоуп.