Ашьапылампыл ахраҿа хадазы: "Нарҭи" "Гагреи" рыхәмарра

Раԥхьатәи ампыл амба иҭаршәын ирласны - ажәбатәи аминуҭ аан "Нарҭ" ахәмарҩы Ҭемыр Агрба харантәи дыкшан, хьаҳәаԥаҳәада илҭаиршәит, 1:0 ааҟалеит. Актәи азбжазы аҳҭнықалақь акоманда ампыл иаҳа анапаҿы иааганы иаман. Гаграа раԥхьаӡа акәны 23-тәи аминуҭ азоуп аҟәаа рымба аганахь ампыл анашьҭра анрылша.

Минуҭқәак рышьҭахь аҟәатәи ашьапылампыласцәа аҩбатәи ампыл амба иҭадыршәырц акы аарыгымхеит, аха иара ашьаҟа иаахеит. Актәи азбжа аанҵәон еиԥш, "Нарҭ" ахәмарҩы Асхат Аршба ампыл амба иҭаиршәит, аха гаграа напыла ахәмарра ыҟан ҳәа аӡбаҩ адырра ирҭо иалагеит. Иҟалаз шыҟалаз аилкааразы, аӡбаҩ хада Дмитри Жуков авидео ианнаҵаз дахәаԥшны иангәеиҭа, ампыл шҭашәаз шьақәирӷәӷәеит - 2:0.

Аҩбатәи азбжазы "Гагра" рыҽдырӷәӷәеит, иаразнакгьы Инал Акәыџба ампыл ҭаиршәит - 2:1. Уажәшьҭа аҟәатәи акоманда уаанӡа иаанарԥшуаз аԥыжәара шамамызгьы, гаграа уаҳа ирызҭамыршәит, аҟәаагьы ҩ-мпылк рҿы иаангылеит.

1 / 14

Аҟәатәи "Нарҭ" ашьапылампыл азы Аԥсны ахраҿа хада иаиааит.

2 / 14

Аҳҭнықалақь акоманда 2:1 ҳәа акоманда "Гагра" иаиааит.

3 / 14

Ахәмарра даара аинтерес аҵан.

4 / 14

Ахәмарыҩцәа аиндаҭлара бзиа аадырԥшит.

5 / 14

Ишыхьҭазгьы, ахәаԥшцәа маҷымкәа еизеит.

6 / 14

Аӡбаҩ хадас дыҟан Дмитри Жуков.

7 / 14

Ахәмарраан ашьапылампыласцәа аԥыжәара агаразы ирылшоз ҟарҵон.

8 / 14

Раԥхьатәи ампыл ҭадыршәит "Нарҭ" ахәмарыҩцәа.

9 / 14

Аха "Гагра" ус баша иаҵахаргьы руамызт.

10 / 14

Иҟан аԥҟарақәа реилагарагьы.

11 / 14

"Гагра" ашьапылампыласҩы ампыл иманы амбахь дыццакуеит.

12 / 14

Актәи азбжа хыркәшан 2:0 ҳәа "Нарҭ" аиааирала.

13 / 14

Аҩбатәи азбжаан гаграагьы ампыл ҭадыршәит, ахәмарра зыркәшан 2:1 ҳәа.

14 / 14

Аԥсны Ашьапылампыл азы Ахраҿа хада иаиааиз "Нарҭ" ргәырӷьара ҳәаа амам.