АҞӘА, хәажәкыра 21 – Sputnik, Асмаҭ Ҵәыџьба. Аԥсны Апарламент ақәшаҳаҭхеит Гәылрыԥшь араион аҿы 56 гектар иҟоу адгьылҭыԥ зҭакԥхықәра ҳәаақәҵоу аилазаара "Логистик Центр Групп" иаҭазарц амшын баӷәаза аргыларазы.
Амшын баӷәаза дыргыларц ргәы иҭоуп Бабышьра ақыҭан. Азакәан инақәыршәаны, фымз ирылагӡаны аилахәыра "Логистик Центр Групп" аргылара апроект цәырнагароуп, уи ианазыразха, шықәсыки бжаки ирылагӡаны аобиект дыргылароуп, иара убас аекологиатә експертиза мҩаԥыргароуп. Арҭ ашьаҿақәа зегьы акакала ианымҩаԥымгаха, адгьылҭыԥ ахархәаразы азин рымххоит.
Апарламент аиҳабы ихаҭыԥуаҩ Саид Ҳаразиа иазгәеиҭеит амшын баӷәаза иазоурыжьуа адгьыл иаҳа-иаҳа иӡбааррахо ишаҿу.
"Арҭ адгьылқәа рхархәара ҳаламгар, аҟәара ԥхасҭахар алшоит. Сара сгәанала, иарбанзаалак апроект бзиоуп. Аӡәыр иԥара алаҵаны, ак иргылар иҭахызар, мап ицәктәым. Ҳганахьала ԥырхага ҟаларым", - иҳәеит иара.
Апроект ахарџь - 10 млрд мааҭк, иара аурыс-аԥсуа обиектуп.
Апарламент ақәҵара амч аиуеит уи анрыдыркыла инаркны.