АҞӘА, хәажәкыра 26 – Sputnik. Жәлар Реизарахь алхрақәа аҩбатәи ртур амҩаԥгаразы алхырҭатә ҭыԥ хадақәа 17 рҟны иаарту 64 алхратә ҭыԥқәа зегьы русура иалагеит асааҭ 8:00 рзы ҳәа аанацҳауеит Аԥсны АКХ.
Хәажәкыра 12 рзы еиҳа абжьы зауз акандидатцәа Жәлар Реизара 17 ҭыԥ рахь иқәгылоуп 34-ҩык. Урҭ рҟынтәи ԥшьҩык ҳәсақәоуп, 30-ҩык хацәоуп.
Азакәан инақәыршәаны, бжьы заҵәык ала еиҳахаз акандидат даиааит ҳәа дыԥхьаӡоуп. Абжьыҭара инеираны иҟоуп ҳәа алхыҩцәа рхыԥхьаӡара иазԥҵәоу ыҟаӡам.
Аԥсны Жәлар Реизарахь алхрақәа мҩаԥысит хәажәкыра 12 рзы. 35 ҭыԥ рахь иқәгылан 123-ҩык акандидатцәа. Иахьазы адепутатцәа алхуп 17 алхырҭатә ҭыԥ рҿы, даҽа 17 ҭыԥ рҿы алхрақәа аҩбатәи ртур мҩаԥысуеит,18-тәи алхратә ҭыԥ хадаҿы - аиҭалхрақәа.