АҞӘА, хәажәкыра 26 - Sputnik. Асааҭ 20:00 рызтәи аҭагылазаашьала апарламенттә алхрақәа аҩбатәи ртур аан ауаажәларратә зинеиҿкаара аилагаразы дыррак ыҟамызт ҳәа аанацҳауеит Аԥсны ААР апресс-маҵзура.
Аԥсны Алхратә комиссиа хадагьы адырра ҟанаҵахьан асааҭ 20:00 рзы атәылаҿы еилагарак аҭыԥ амамызт ҳәа.
Иара убас иазгәаҭоуп алхратә ҭыԥ хадақәа 17 рҿы ауаажәларратә зинеиҿкаара ахьчаразы 600-ҩык аҩнуҵҟатәи аусқәа рминистрра аусзуҩцәа рнапы шалакыз.
Уи адагьы, амчратә усзуҩцәа АКХ ахь алхратә комиссиақәа рлахәылацәа анцоз ирыцын, алхратә документациа рыхьчон.
Алхратә комиссиа хада аусура анхыркәшахалак ашьҭахь, Аконфедератцәа рымҩа ахәҭа, Арӡынба имҩа инаркны Лакоба имҩаҟынӡа иахьарку аартхоит.