АҞӘА, хәажәкыра 26 – Sputnik, Бадри Есиава. Актәи аҭыԥқәа ԥшьба, аҩбатәи аҭыԥқәа акы ранашьахеит Гагратәи аспортшкол аклубқәа Анапа имҩаԥысуаз Урыстәылазегьтәи ртурнир "Anapa Сup" аҟны ҳәа еиҭеиҳәоит азыҟаҵаҩ Алексеи Бондаренко.
"Гагрантәи атурнир иалахәын акомандақәа хәба - 2008 шықәса инаркны 2013 шықәсанӡа ииқәаз злахәыз. "Ахьқәа" ԥшьба, "араӡны" акы ранашьахеит. Ҳара ари атурнир изныкымкәа ҳҽалаҳархәхьеит. Ииасыз ашықәс азгьы аҩбатәии ахԥатәии аанаҳкылеит", - иҳәеит иара.
Бондаренко иҳәеит аицлабрақәа ишрылахәыз 30 команда - Анапа, Ростов-на-Дону, Таганрог, Краснодар уҳәа рҟынтәи. Арҭ ақалақьқәеи арегионқәеи 6-8 команда ықәдыргылеит.
Азыҟаҵаҩ иажәақәа рыла, ҵыԥх аасҭа сынтәа алҵшәақәа реиӷьтәра алшеит аспортсменцәа қәыԥшцәа рҽазышәаралеи рнапхгаҩцәа лҵшәа бзиала русуралеи.
"Маҷ-маҷ ҳаизҳауеит. Ахәыҷқәа рԥышәа иацлоит. Аҭагылазаашьа иахәазар ауеит иалахәхараны иҟаз зегь ахьзымнеизгьы", - иҳәеит Бондаренко.
Алексеи Бондаренко идагьы "ДЮСШ Гагра" акомандақәа азыҟарҵоит Витторио Куциеи Џьанкат Чқәуеи.
Анапа иреиӷьу ахәмарыҩцәа ҳәа иалыркааит: Саид Ԥкьын, Русҭам Возба, Захар Полиаков. Иреиӷьу ахьчаҩбжацәа ҳәа иалхын: Доминик Шьакаиа, Амирхан Бганба, Амаль Абыџба. Иреиӷьу амбахьчаҩ ҳәа ихьӡ рҳәеит Владимир Хышба, иреиӷьу ажәылаҩ - Едуард Узуниан, атурнир аҿы иреиӷьу хәмарҩуп ҳәа далкаан Роман Малиа.