Константин Озган диит лаҵарамза 15 1939 шықәса рзы Гәдоуҭа араион Лыхны ақыҭан. 1978-1989 шықәсқәа рзы ареспубликаҟны имҩаԥысуаз аполитикатә процессқәа зегьы дрылахәын. Амилаҭ-хақәиҭратә қәԥара алахәразы иара иусурагьы дамхын.
Еиуеиԥшым аамҭақәа рзы Константин Озган Адәныҟатәи аусқәа рминистрреи Аекономика аминистрреи напхгара риҭон, Ашәахтә маҵзура ахантәаҩыс дыҟан, Апарламент аиҳабы ихаҭыԥуаҩыс далхын. Иԥсҭазаара аҵыхәтәантәи ашықәсқәа рзы ареспублика Абыргцәа рхеилак дахагылан. Иԥсҭазаара далҵит хәажәкыра 22 2016 шықәса рзы.
Константин Озган аԥсрашьҭахь "Ахьӡ-аԥша" аорден I аҩаӡара ианашьоуп Аԥсны Аҳәынҭқарразы иааирԥшыз илшамҭа дуқәа рзы, амилаҭ-хақәиҭратә қәԥараҿы илагалазы.