АҞӘА, ԥхынгәы 24 - Sputnik. Шәача илеиз ақәаршҩы ӷәӷәа иахҟьаны аӡхыҵрақәа ҟалеит, аԥсҭбарагь ацуп ҳәа иҩит ақалақь ахада Алексеи Копаигородски ихатәы Telegram-канал аҟны.
"Аԥсҭбара ҟалеит, дҭахеит аԥҳәыс. Лыуацәеи лҭынхацәеи срыдышшылоит", - ҳәа иҩуеит иара.
Амшцәа иахҟьаны иҟалаз аԥырҟәҟәаразы зқьҩык инреиҳаны аҟазацәеи 400 ак атехникеи аладырхәит ақалақь ахадара. Алексеи Копаигородски иазгәеиҭеит амшцәгьаз агәҽанызаара шыҟоу, ақалақь ауааԥсыреи асасцәеи рахь аҳәара ҟаиҵоит ргәырҽанызарц.
Шәача ақәыршҩы ӷәӷәа леит ԥхынгәы 23-24 ауха, арегион АҶА адыррақәа рыла сааҭкала 55 мм ақәа леит. Амҩадуқәа рыҟны аӡқәа хыҵны ирнылеит, иҟоуп аӡы иагаз амашьынақәа. Аҩнқәа аӡы рыҵалеит, актәи аихагылақәа рыҟны аӡы ахьыҩналаз атехника ҷыдала ҩныргеит.
Ақалақь ауааԥсыра лашарада иахьаанхазгьы ыҟоуп, Шәача ахадара ихадоу ахыбрақәа лашарала еиқәдыршәеит.
Иҟоу адыррақәа рыла, уажәы Шәача амҩадуқәа рыҟны автомашьынақәа рныҟәара шьақәыргылоуп. Ԥыҭрак анаҩс аҟазауаа иҭырҵаауеит амҩаду хада А-147 Џьубгеи Аԥсны аҳәааи рҭыԥқәа рыҟны аҭагылазаашьа шыҟоу. Араҟа акурорт аамҭазы аиҭашьақәыргыларатәи арӷәӷәаратәи усурақәа аанкылан. Иара убас аусуцәа игәарҭоит ишәарҭоу аҭыԥқәа.