Аԥсны ҭагалан шааиз еиҳа иуныруеит абҵарамзазы. Убасҟан ауп аԥсабара ахьтәы маҭәа анашәнаҵо.
Абри аамҭазы аԥсуа ҩыҟаҵаҩцәа ажьҭаара иалагоит.
Амҵәышә рыманы аҵлақәа ирхалоит.
Раԥхьа иргыланы аҩ ҿа - амаҷар ҭарҭәоит.
Иара убас абҵарамзазы амандарина аҭаара иалагоит.
Ари ашәыр хьы-уаркалеи ҩнаҭацыԥхьаӡа аишәа иахьықәым ыҟам.
Амандарина афара адагьы, уи ашәырӡы алырхуеит, еиларшны аџьемқәа рылырхуеит.
Ақыҭауаа иара убас русқәа иреиуоуп аԥҳә аизгара - уи ақыҭанхамҩаҿы даара ихәарҭоуп.
Аԥсуа ҳәсақәа ракәзар, рхьынапқәа ирзымдыруа ак ыҟам - аџьанџьыхәа, ахәырмарҩа, алаҳарҩа уҳәа ахаамыхаақәа ҟарҵоит.
Ахәырмарҩа зегьы бзиа еицырбоит, ҳтәыла иаҭаауа асасцәагьы уи агьама рымбакәа руам. Иара ацәа ахыхны, ашьапқәа еидҿаҳәаланы амра ицәҵаны идырҩоит.
Иара убас аԥсуаа жәытәаахыс иҟарҵо ахаақәа иреиуоуп аџьанџьыхәа. Араса ма акакан рыԥхны, ажьырӡы шылала еиларшны, иӡаашьны икнаҳаны идырҩоит.
Ақыҭаҿы иахьа уажәраанӡа имаҷҩым ацқәа ҵаҳәаны уардынла амхы ҭазгало.
Аџьықәреи шьапқәа ирыкәшо аҟәыд иазҳауеит, урҭ еицҭаргалоит.
Иҭаргалаз аџьықәреи цәдырҳәуеит.
Нас аца иҭарԥсоит. Аца шышны иахьыҟоу иабзоураны аҳауа ҩнасуеит, аџьықәреи ус акыраамҭа иԥхасҭахаӡом.
Аԥснытәи ҭагалан убла хнакуеит, аԥсабара ҭалаҳауп ихьҩежьу, ицәхаԥшьу, иахьаԥшшәылоу уҳәа ԥштәы рацәала.
Ари аамҭазы иагьыхьҭацәам, иагьшоурам, сааҭла унеиааиуазаргьы, угәы ԥҵәом.
Ушьапы ахьнылаургылалак, џьара ссирк уԥыхьамшәар ауам.