Сызрань иҟоу арра-авиациатә ҵараиурҭеи Георги Жуков ихьӡ зху Арра-дҵаҟаҵаратә академиеи данрылга ашьҭахь Сулҭан Сосналиев 29 шықәса аус иуан СССР аҳауаҽацәыхьчаратә мчқәа рҿы. Иара данысит аԥырҩы инаиркны аҳаирхәҭа адҵаҟаҵаҩ иҟынӡа амаҵурамҩа, ихырҵеит СССР зҽаԥсазтәыз арратә ԥырҩы ҳәа ахьӡ, ианаршьеит Арратә Бираҟ Ҟаԥшь аорден.
"Кавказ ашьхарыуа жәларқәа Рконфедерациа анаԥҵаха ашьҭахь, иара инапы ианырҵеит уи арратә ҟәша напхгара аҭара. Уи аусура активла дахьалахәыз иабзоураны иара еиҳагьы ибарҭан Аԥсны акәшамыкәша аҭагылазаашьа еиҳа-еиҳа ишшәарҭахоз. Убри азы иара изныкымкәа Аԥсныҟа даахьан, Владислав Арӡынба диԥылахьан, Егры аҳәаахь дцахьан, Аԥсны мрагыларатәи ахәҭа ҭиҵаауан. Ҽакала иуҳәозар, иара гәынхәҵысҭала ихаҿы иҭихуан ақырҭуа архәҭақәа Аԥсны иақәлозар, иарбан мҩақәоу илырхырц ирылшо", — ҳәа иҩуеит арратә ҭоурыхҭҵааҩ Валикәа Ԥачлиа Сосналиев 70 шықәса ихыҵра иазкны ииҩыз астатиа "Полководец" аҿы.
Ақырҭуа архәҭақәа нанҳәамза 1992 шықәса рзы Аԥсны ианақәла, Сулҭан Сосналиев Ҟабарда-Балкариантәи хатәгәаԥхарала иҳацеибашьырц раԥхьаӡа иааз ҳашьцәа раԥхьа дгылан.
Аибашьраан Сосналиев Аштаб хада деиҳабын, Аԥсны атәылахьчара аминистр актәи ихаҭыԥуаҩс дыҟан. Иааирԥшыз агәымшәареи афырхаҵареи рзы 1994 шықәса рзы Владислав Арӡынба идҵала Аԥсны Афырхаҵа ҳәа ахьӡ ихҵан, аинрал-леитенант ичын иҭан.