Аԥсны акадифаамҭа аҳра ауеит.
Жьҭаарамза ҳҭагылоуп, аха амра ашәахәақәа макьана ихааӡа иԥхоит. Уи ргәалаҟазаара шьҭанхуит ҳтәыла ауааԥсыреи асасцәеи.
Урыстәыла регионқәак рыҟны раԥхьатәи асы леихьеит, Аԥсны - ашәҭқәа рыфҩыхаа аҳауа иалоуп.
Амра хаа уқәыҷҷо адәахьы уаамҭа аныухыуго, ухахьгьы иузаагом даҽа ҩымз рышьҭахь ашықәс ҿыц ааиуеит ҳәа.
Иуаркалеиуа аԥсабара аԥшшәқәа угәалаҟазаара шьҭырхуеит.
Аԥсабара иазҿлымҳау алшара рымоуп Аботаникатә баҳчаҟны инхо аԥстә хәыҷқәа рабадырра.
Шәҭышла иқәҵоу амҩахәасҭа анысра умчқәа еизнарҳауеит .
Аботаникатә баҳчаҟны иазҳауеит зеихкы уҭаху ашәҭ блахкыгақәа.
Апатырқалԥшшәы змоу арҭ акадифашәҭқәа напыла ихырҷоушәа ауп ишыҟоу.
Аботаникатә баҳча акыр зхыҵуа, ауаа рацәа зҭаауа, Аҟәа ақалақь аҭыԥ ԥшӡарақәа иреиуоуп.
Иара аҵакыра хә-гектарк рҟынӡа иҟоуп.
Абаҳчаҿ иазҳауеит ԥшьнызқь рҟынӡа, адунеи акәакьқәа зегь рҟынтәи иаагоу аҵиаахкқәа.
Аботаникатә баҳча анаԥҵаз инаркны, атәым ҳәынҭқаррақәа рҟынтәи аҵиаақәа рааӡараз, азҵаарақәа ахьырӡбоз ихадоу аҭҵааратә центруп.
Абаҳча - акырынтә Жәларбжьаратәи ацәыргақәҵақәа ирылахәхахьеит Германиа, Чехиа, Москва, Санкт-Петербур уҳәа, изныкымкәан ахьи араӡни медалқәа иаԥсахахьеит.
Аботаникатә баҳчаҿ изызҳауа аҵиаақәа рыдагь, Аҟәа беиоуп аԥсабара аиаҵәарала.