Аԥсны Аҩнуҵҟатәи аусқәа рминистрра акаҳуажәырҭақәеи ақьафурҭақәеи рнапхгарақәа адҵа рынаҭеит рышәқәа рҿы абџьар рыманы аӡәгьы дыҩналар шыҟамло атәы зҳәо адыргақәа ҟарҵарц. Ареспубликаҿы абџьар аныҟәгареи аҵәахреи рзы аԥҟарақәа рықәныҟәара ахылаԥшра дырӷәӷәоит, ҷыдала ахшыҩзышьҭра аҭоуп ауаа рацәа ахьеизо аҭыԥқәа рҿы аныҟәгара ақәиҭымтәра ҳәа адырра ҟарҵеит аусбарҭаҿы.Азинхьчаратә усбарҭақәа ареспублика араионқәа зегьы рҿы иааиԥмырҟьаӡакәа апрофилактикатә усмҩаԥгатәқәа нарыгӡоит.
Гагра араион аҿы иҟалаз амҩатә машәыр аан хаҵак дҭахеит. Аԥснытәи Аҳәынҭавтоинспекциа аиҳабы Дамеи Аҩӡба Sputnik иеиҭаз адыррала, Аԥсны атәылауаҩ Дамир Ҳагба Гагрантә Аҟәаҟа дшаауаз, имҩа ала аԥыралеит, уи дамысырц азы имашьына ирҵәиин, егьи амҩа ацәаҳәахьы диасит. Уа иҿаланы иааиуаз аурысцәа Виачеслави Надежда Шчуренкои зҭатәаз амашьына дасит. Уи ашьҭахь Ҳагба имашьына аршәын, ахԥатәи амашьына иаҿаҳаит, уи аныҟәцаҩ дызусҭаз макьаназы иҭҵаам.
Раԥхьатәи аргыларатә цәыргақәҵа мҩаԥысит Гәдоуҭа ақалақь аҿы лаҵарамза 18 рзы. Уи иалахәын аргылара, ауадақәа рыҩнуҵҟатәи адизаин, архитектура рзы амаҭәахәқәеи амаҵзурақәеи рыдызгало аԥснытәи аргыларатә наплакқәа 12. "Иуадаҩуп амаҭәахә аазго рахьтә зыгәра угаша рыԥшаара. Убри азы ҳара аӡыргара еиҿаҳкааит, уи иаҭаауа зегьы ирҭаху аконтакт аԥшаара рылшарц, ԥхьаҟа аусеицура рыбжьарҵарц азы", — ҳәа азгәалҭеит аиҿкааҩ Александра Галыгина.
Аԥсни, Ҟрыми Краснодартәи атәылаҿацәи сынтәатәи аԥхынразы Урыстәыла атуризм иахырхарҭа хадоуп. Урыстәылауаа Аԥсни Азовтәи амшыни иахьаԥну иалыркаауа иалагеит Анапа амшын амазут ианаҟьышь ашьҭахь, абри атәы "Звезда" иазеиҭеиҳәет РСТ апресс маҵзура анапхгаҩы Артур Абдиуханов. Иара иажәақәа рыла, ақәыӷәӷәара змоу мзақәоуп — рашәара, ԥхынгәы, иара убас цәыббра аҽеиҩшамҭазы.